No.4169/2021-2022
Dated Aizawl the 3rd March, 2022: Vawiin hian Serchhip District Beti Bachao Beti Padhao buatsaihin nikhat awh Art Workshop, DC Conference Hall ah buatsaih a ni a, bawrhsap Pi Nazuk Kumar, IAS chuan he workshop hi a hawng.

Pi Nazuk Kumar chuan, India ram zau zawk en chuan hmun tam takah hmeichhiate dinhmun a la hniamin, venhimna leh zirtirna tha pek thuah nasa taka hmasawnna tur a la awm hlawm a. Mizoram erawh chu hmun dangte ngaihtuah chuan kan dinhmun a tha hle a, Serchhip district phei chu kan dinhmun a tha hle a ni. Amaherawh chu hmasawn kan ngaihna laite pawh tam tak a la awm thova, Property Right lamah te, Legal right chi hrang hrangah hmasawn tulna a la awm a ni, a ti a. Hmeichhiaten hma kan sawm zel theihna hi he programme in a tum ber a nih angin hmalakna pawh kawng hrang hrangin kalpui zel a ni, a ti a. Art Workshop a hlawhtlin theih nana thawhpuitu Aizawl Art Gallery & School of Fine Art te chungah lawmthu a sawi a ni. Pi Nazuk Kumar hian amah ngei pawh Art lamah a tui hle tih sawiin vawiina Workshop ah pawh hian lem ziakin a tel ve nghe nghe a ni.

A hawnna inkhawm hi Pu Lalmuansanga Ralte, Addl DC in kaihruaiin Beti Bachao Beti Padhao thiltum tlangpuite sawi hawnna a nei a, sawrkar laipui flagship programme a nih thu leh hmeichhe naupangte venhim leh zirtirna pek chu a thiltum ber a nih thu sawiin, fanute venhim leh zirtirna tura inzirtirna chi hrang hrangte chu Serchhipah zirtir thin an ni, a ti a. Vawiina Art workshop pawh hian chutiang lam mipuite zirtirna leh hmeichhe naupang, Art lama tui mite kawng kawhhmuhna a ni dawn a ni, a ti a. Vawiina an lemziakte chu Exhibition ah la phochhuah leh a nih tur thu a tarlang bawk.

Pu Laltanpuia, Chairman, Aizawl Art Gallery & School of Fine Arts pawhin thusawiin, Serchhip district BBBP thuneituten Art Workshop buatsaihna chang an hria leh thawhpuia an sawm chu lawmawm a tih thu a sawi a. Lemziak te hian sawi aia fiahin thinlungah hna an thawk thei a, mitthlaa cham reng thuchah min pek thin avangin a hlu em em a. Hmeichhiate venhimna leh zirtirna kawnga mite thinlung cham reng lemziak tha tak tak neih ngei kan tum dawn a ni, a ti a ni.

A hawnna inkhawm tawi hman zawh hian Workshop hi neih chhunzawm nghal a ni a, Aizawl Art Gallery & School of Fine Arts atanga lokal Senior Artists pathum leh junior Artists sawmpahnih; leh Pi Nazuk Kumar, IAS, Serchhip bawrhsapten thupui pathum Women Empowerment, Promotion of Education to Girl Child leh Gender Equality tih zinga an duh ber hmangin lem an ziak a. Serchhip khawpui chhunga zirlai naupang leh a duh apiangte tlawh theihin ruahmanna an siam bawk a ni. An lemziakte hi International Women’s Day, 2022 lawmnaah Exhibition neihpui leh tura ruahmanna siam a ni.