4798/2024-2025

Siaha the 25th March 2025: Vawiin chawhma dar 11 khan DRDO Conference Hall, Siaha- ah ‘The Mizoram Bana kaih’ (Hand Holding Scheme) hnuaia progress partner-te tan orientation training buatsaih a ni a, he hun hi General Manager, DIC Siaha Pu M Misael, Project Director, DRDO nibawk chuan a kaihruai a ni.

Pu M Misael chuan Siaha District khawchhung leh pawn atanga kalkhawm progress partner-te chu chibai bukin training chhim tura kim taka an kalkhawm avangin lawmthu a hrilh a, vawiina resource person tur te hmelhriattirna neiin an thusawi tur te ngun taka ngaithla theuh turin a sawm a ni. Trade hrang hrang hnuaia training tura kohkhawmte chu an vaiin 25 an ni tih tarlangin chungte chu : 

1) Agriculture- 2

2) Vety-2

3) Fishery-1

4) Horticulture-15

5) Land resources- 2

6) Tourism-3 te an ni a ti. 

Pu M Misael chuan sawrkar in sumdawng te lẹh loneitute a ngai pawimawh hle a, an hlawhtlin pui ngei theihna turin theihtawp chhuahpui a huam reng tiin ‘Bana Kaih Scheme’ chu a hlawhtlin ngei theih nan loan diltute pawh theihtawp chhuah theuh turin a ngen a ni.

Pu Chawngdingliana, Extension Officer, DIC Siaha hnen atangin Mizoram Bana Kaih Scheme sawifiahna bakah Finance leh Accounting chungchang inzirtirna ngaihthlak a ni a, Pu KC Vanlalvena Chief Manager SBI, Saiha chuan banking chungchanga hriattur pawimawhte sawifiahna a nei nghalin zawhna leh chhanna hun buatsaih nghal a ni.

Line department hotute hnen atangin a Progress partner te fuihna leh hriattur pawimawh te hrilhhriatna an neih zawh hnuin vawiina kalkhawmte hnenah certificate semna neih nghal a ni.