2257/2026-2027

Dated Champhai, the 17th September 2026: Vawiin khan Bana Kaih (Hand Holding) hnuaia Pilot Project: ranchaw atana Vaimim nuaina khawl leh hmanraw pawimawh hlanna hun chu Vaphai Community Hall-ah AH &Vety Minister Pu C.Lalsawivunga'n khuallian niin a hmanpui a. Saikhumphaia Vaimim chinna hmunpui chu a hmunah kalin an hnathawh dan a enpui bawk.

Khuallian Pu C.Lalsawivunga chuan thu sawiin, Sawrkarin kuthnathawktute hamṭhatna a ngai pawimawh ber a, taimakna hmanga din chhuahna hun remchang a inhawng mek a. Thlai hralh theih lohva kan ngaih thinte chu tun sorkar hnuaiah a hralhna awm sain thar a ni tawh, a ti a. Vaphai khuain vaimim a thar chhuah pawh department chuan an khuaa leisak turin ruahmanna a siam thu a sawi.

Minister chuan kalkhawmte chu taimakna lama ṭan la turin a fuih a. Sawrkar atanga kan dawnte aiin Pathianin min pek kan thahrui leh kan finna te hmangin, taimakna nen ṭang ila, chutah chuan intodelhna a awm thin a. Hei hi kan ram, kan hnam leh kan khawtlang tana kan pen chhuah theihna kawng pawimawh tak a ni, a ti.

Hei bakah hian loneitute chu chemical hmang lova thlai chinna, organic lama tan la turin a chah a. Hlo tur leh a dang hman hian awlsamna thlen mah se hriselna atan a tha lova. Chubakah organic farming chu thlai thar hralh chhuahna lama thil pawimawh tak a nih tak zel avangin kan uar deuh deuh a tul a ni, tiin a sawi.

He hun hi Pu Lalsangliana, Secretary, AH & Veterinary Department chuan a kaihruai a, Dr.Robert Rualthankhuma Dy.Director, AH & Vety chuan technical report pein, Pu C.Rengkhuma, VCP, Vaphai chuan thu a sawi a, Dr Lalrotluanga Sailo, Director AH & Vety Department in lawmthu sawina a nei bawk a ni. Hemi hnu hian Vaimim nuaina khawl leh hmanraw hlanna hun hman a ni.

AH & Vety Department chuan Handholding Scheme hnuaiah ranchaw tur Vaimim leh Bekang contract farming chu Champhai, Saitual leh Khawzawl district-a khaw 11-ah te kalpui mekin, vaimin chi tha CP 808 quintals 44.28 leh bekang ching duh te tan quintal 21.84 an sem tawh a. Project-ah hian kum thum atan Rs.4.08 crore ruahman a ni a. He Pilot project hnuaiah hian Vaphai khuaa loneitu mi 114 ten vaimim an ching a, Saikhumphai leilet aṭang hian vaimim ṭin 20000 thar chhuah theih beisei a ni