2256/2026-2027

Aizawl dated 17th September 2026: Aizawl Municipal Corporation hmalakna a Aizawl khawpui chhunga in tina bawlhhlawh thliar dan leh lakkhawm dan kalphung thar, '4- Stream Waste Segregation and Door to Door Collection' chu Solid Waste Management Rules, 2025 mila kalpui tan turin, AMC Auditorium, Thuampuiah tlangzarh a ni a. Pu K.Sapdanga, Minister, Urban Development & Poverty Allievation Department chu khuallian niin, Pu Khilli Ram Meena, Chief Secretary, Govt. of Mizoram chu khual zahawm a ni.

'4- Stream Waste Segregation and Door to Door Collection' kalpui tan tura tlangzarhna ah hian UD & PA Minister Pu K.Sapdanga chuan faina chu khawvel hmun hrang hrangah changkanna tehfung pawimawh berte zing ami a nih thu a sawi a. Mimal, chhungkua, khawtlang, veng, ram leh hnam changkang tur hian fai kan ngaihnat a, fai tura inzirtir leh hmalak a pawimawh tak zet a ni, a ti.

Minister chuan Aizawl chu, ziaktu leh zin mi thenkhat ten India rama khawpui fai zingah an tarlan fo thu sawiin Faina kawnga hmahruaitu nih tum zel turin Aizawl AMC Ward hrang hrang viltute chu a chah. Hun engemaw chen chu Aizawl veng tinah hlawhtling takin bawlhhlawh chi hnih a thliar kalpui a nih tawh thu sawiin, Solid Waste Management Rules 2026 hnuaiah chuan bawlhhawlh chi 4 a thliar a ngai tawh dawn, tih a sawi a. He hmalakna hi khawtlang thianghlim, fai leh hrisel kan siamna kawnga ruahmanna pawimawh tak a nih angin, a tih hlawhtlin kawngah pawh chhungkua, khawtlang leh kohhran kan tanrual a pawimawh thu a sawi.

Pu K.Sapdanga chuan faina tluantling nei tur chuan faina leh tlawmngaihna suihzawm thiam a tul thu sawiin, Aizawl khawpui chhunga AMC Ward pasarih chhunga ‘4- Stream Waste Segregation & Door to Door Collection’ kalpui mek a ni chu entawntlak a tih thu a sawi a. Tlawmngaihna dik tak chhawm nung zel chungin faina kawng zawh a pawimawh thu leh, kan rinna nen pawh fai hi a inhmeh hle thu a sawi a. Fai inzirtir tur hian khawtlang leh kohhrante an tangkai hle thu a sawi bawk a ni.

Khual zahawm Pu Khilli Ram Meena, Chief Secretary chuan bawlhhlawh lakkhawm leh sawngbawlna mumal taka kalpui chu Supreme Court-in a ngaih pawimawh hle thu sawiin, Solid Waste Management Rules 2026 pawh hi March ni 31, 2027 hmain a taka kalpui vek hman turin Supreme Court chuan a phut thu a sawi a. Solid Waste Management Rules 2026 chu Aizawl Municipal huam chhung veng tin a bawlhhlawh lakkhawmte chu a tam thei ang ber hmannawn theih thil tangkaia siam chhuah a nih theih nana hmalakna a nih thu a sawi.

AMC Mayor Pu H.Lalremtluanga chuan ‘4 Stream Waste Segregation & Door to Door Collection’ kalpuina kawnga hmahruai tura Ward pasarih huam chhunga veng 32-te chu Ward dangte tana entawntlak a hma la zel turin a  chah a. Aizawl khawpui chu ‘Silent City’ tiha State pawn a kan than mawina belh chhah turin khawpui fai ber nih tuma hma la turin kalkhawmte a sawm bawk a ni.

'4- Stream Waste Segregation and Door to Door Collection' kalpui tan tura tlangzargna hunah hian Pu Joseph H.Lalramsanga, IAS, Municipal Commissioner, AMC chuan kalkhawmte lawmna thu a sawi a. Pu Lalremruata Kullai, Joint Municipal Commissioner chuan Solid Waste Management Rules 2026 nih phung a sawi fiah a. AMC Ward 8 leh 18 Committee member atangin '4- Stream Waste Segregation and Door to Door Collection' an kalpui dan ngaihthlak niin Pu C.Lalmuanawma, Town Planner chuan lawmthu sawina hun a hmang a. He hunah hian AMC Executive Coporator, Corporator, Ward Council member-te, UD&PA Department hotute leh NGO hruaitute an tel a ni.

'4- Stream Waste Segregation' ah hian bawlhhlawh hi chi 4 a then hran a ni a. Wet - Bawlhhlawh tawih thei, Dry - tawih thei lo, sawngbawl theih, Sanitary Waste - tawih thei lo, uluk taka fun that ngai leh Special Care Waste - Bawlhhlawh, ram leilung leh mihring hriselna atana hlauhawm te a ni a. Bawlhhlawhte hian a paihna bawm rawng hran vek an nei a. A paihna bawn hran siam a nih bakah, a phurhna, sawngbawl dan leh a paihna hmun pawh a hranpa veka buatsaih tur a ni.