2263/2026-2027

Aizawl the 18th September 2026: Vawiin khan Irrigation & Water Resources Conference Hall-ah Chief Minister Pu Lalduhoma chuan Bana Kaih thawh thumna (Handholding 3.0) a tlangzarh.

Thu sawiin Chief Minister chuan, kum tam tak kan lo tlangau pui thin, thlai thar leina budget-a dah te, Loan pung awm lo (100% interest subvention) leh Bank Guarantor-a sorkar a tan theih thute chu Bana Kaih scheme kaltlang hian kan tihlawhtling chho zel a, kalphung thar chhinchhiahtlak, ram tana tangkai bawk si a ni, a ti a. Bana Kaih a hlawhtlin theih nana mawhphurtute zawng zawng chungah lawmthu a sawi a ni.

Chief Minister thusawi dang langsarte chu :

1. Bana kaih hian a huam zau a, sorkar development scheme zawng zawng deuh thaw hi a huam a. Mi nawlpuiin kan hriat lar, Thlai thar lei, Loan Component leh CM Package bakah infrastructure din nan project eng emaw zat kan kalpui bawk a. Turmeric Processing Industry at Industrial Growth Centre, Luangmual, Ginger Processing Unit at Horti centre, Sairang, CMs Innovation Challenge, Mizoram Handholding Venture Capital Fund, Procurement of Solar Dryer & Slicing Machine, Wheat & Maize Contract Farming leh Construction of Drying Shed and Hay Making at AH&Vety Farm at Thenzawl te chu a langsar zual an ni.

2. Partner Banks-te nena kan thawhhona a tha a. Progress partner ten loan an rulh that thute kan lo hria a. Bana kaih hmangin moral reformation a thleng mek a ni.

3. Kan thalai, ram pawna hna zawng mekte tan Bank loan lak tur a awm loh avangin mi tam takten harsatna an tawk tih kan hria a. Foreign Placement Loan hi Handholding kaltlanga inpek dan kan ngaihtuah mek a. Hei hian thalai engemaw zat employment a siamsak theih kan beisei.

4. Vanduaina avang liau liaua kan progress partner hlawhchhamte tan a thawh thumnaah hian Rehabilitation Scheme siam kan tum.

5. Report-ah khan department thenkhatten partner in ngah bik hle tih a lang a. Kan flagship scheme hi ngaihpawimawh hmasaa nei thin tura kan inngen ang khan theihtawp in lo chhuah zel dawn nia.

6. Organic farming hi uar deuh deuh kan duh a, state pawn atanga chemical fertilizer kan lakluhte hi tlem tial tial se, keimahni siam organic fertilizer hi ngah tial tial ila kan duh hle. Permanent Farming pawh kan uar dawn a ni.

7. Monitoring uar zawka kalpui kan tum a, Mizorama project tam ber hlawhchhamna chhan chu vil zui a nih thin loh vang a ni. Chuvangin, kan Progress Partner zawng zawngte khan - Implementing Department leh Bank-te pawhin an rawn enzui dawn che u tih lo hria ula, dik tak leh rinawm takin pawisa lo hmang ang che u,

8. Handholding scheme hi Vishit Barat 2047 tinzawn rana kalpui kan ni a. Moral Reformation kalpui chung zelin Mizoram economy hi sang taka chawikan kan tum a. Kum reilote chhunga eizawnna thar tam tak siam a, state dangte ruala kal ve kan duh a ni. Chu hna thawktu “Team Mizoram’ chu nang leh kei hi kan ni a, theihtawp chhuaha kan tanho a ngai tih hi kan hre reng dawn nia, tihte an ni.

(Chief Minister thusawi hi ama youtube channelah rawn dah chhuah a ni ang)

Dr. KC Lalmalsawmzauva, Vice Chairman, Mizoram State Policy Coordination Committee chuan Bana Kaih kalpui tawh chinte dinhmun tlangpui report a pe a:

1. A thawhkhatnaah khan CM Special Package hmangin chhungkaw 2,255 te thawhpui an ni a, Rs. 18,33,58,370 sen ral a ni. A thawh hnihnaah CM Special package hi chhungkaw 3113 te thawhpui an ni tawh a Rs. 15,17,45,500 sen ral a ni a, thawhpuina la dawng lo mi 1907 an la awm. Tichuan a thawh khatna leh thawh hnihna hnuaia CM Special Package hmute chu an vaiin 7275 an ni ang.

2. Loan Component bikah hian MSPCC chuan Progress Partner tur hi mi 823 a thlang tawh a, an loan dil zat belhkhawm hi Rs. 1,18,57,70,195 a ni a, dilna la chinfel loh hi 154 a la awm. Heng an thlan tawhte atang hian partner bank ten mi 509 chu loan an pe tawh a. An loan pek chhuah tawh chin belh khawm hi Rs. 46,37,39,450 a ni a, MSPCC in a thlan tawh, bank lamin loan an la pek lohte hi mi 314 an la awm a ni.

3. Partner Bank zingah hian Mizoram Rural bank chuan Loan an pe hnem ber a, mi 328 an pe tawh a, State bank of India chuan 108 pe tawhin pahnihna an ni a, Mizoram Cooperative Apex bank chuan mi 65 an pe tawh a, Union Bank of India in 7, IDBI in 1 an pe tawh a ni. Bank te hnenah Pu Vanlaldina Fanai, Finance & Planning Commissioner chuan lawmman a hlan a ni.

4. Loan hmutute tana Guarantee fee hi sorkar chuan Bank pathumte hnenah Rs. 14,01,762 a pe tawh a, an loan interest hi Rs. 1,12,13,347 a peksak tawh bawk a. Guarantee fee leh interest te rulhsak nana sorkar sum sen tawh chin hi Rs. 1,26,15,109 a ni. India ramah Mizoram chauh hi interest subvention zaa za (100%) rulhsak thei awm chhun nia hriat a ni.

5. Kuminah September ni 8 thleng khan Sawhthing chingtu chhungkaw 11,655 te hnenah Support Price Rs. 50,68,35,960 pek chhuah an ni tawh a. Nikum 2025 chhung khan loneitu mi 22,155 te hnenah Support Price hi Rs. 1,40,84,25,600 pek chhuah a ni bawk a.

6. Kumin hian Khuangleng SCC chuan sawhthing hi an hralh tam ber a, kg 14,52,766 an hralh a, pahnihna chu Cherhlun SCC niin kg 7,03,870 an hralh a, pathumna chu Keifang SCC niin kg 6,21,708 an hralh a ni.

7. Khua ang zawng chuan kuminah Maite khuaten an hralh hnem ber a Kg 3,17,347 an hralh a, pahnihna chu Hliappui niin Kg 2,95,240 an hralh a, pathumna chu Cherhlun niin Kg 2,88,880 an hralh a ni.

8. Mimal anga tharchhuak tamte chu pakhatna Zoramnghaka, New West Phaileng, niin 26462 kgs a thar a. Pahnihna chu Lalmalsawmi, Zion Veng, Champhai niin kg 22,046 a thar a, pathumna chu Helen Lalrosiami, Dungtlang a ni a, kg 21,982 a thar a ni.

Pu Lalfakzuala, CEO, Handholding chuan a thawh thumna kalpui dan tur inkaihhruaina tlangpui sawifiahna a nei a. A kimchangin dahchhuah a ni ang. Tun hnaia CM Special Package kan pek chhuah chu mi thenkhatten 'Sem' tiin an sawihnawm deuh a. Nimahsela, heng CM Special Package te hi project behchhana pek (project base) thawhpuina an ni a, grant a nih avangin rulh a ngai lo thung a ni, a ti.

A thawh thumna dilna hi online handholding.mizoram.gov.in ah thehluh theih a ni a, online-a dil thei lo tan DC, SDO leh BDO office-ah dil theih a ni a. A diltute tanpuitu tur thawktu hrang dah vek an ni a, pawisa chawi a ngai lo. Tin, Bana Kaih dil duhte tana zawhfiahna Helpline Number a awm a, a number chu 8119-019-900 a ni. A dil dan inzirtirna hi youtube-ah en theihin a awm bawk a ni.

Guidelines.pdf