3217/2022-2023

Aizawl, 11th January, 2023 : Vawiin khan Chief Minister Pu Zoramthanga ruahmanna in,  I&PR Minister Pu Lalruatkima, Transport Minister Pu TJ Lalnuntluanga, Commerce & Industries Development Board Vice-Chairman Pu K. Laldawngliana, MLA leh Pu Vanlalzawma, Ex-MP/MLA te chuan Bangladesh ram chhung buaina avanga Zohnahthlak (Bawm) Mizoram lama sahimna zawnga rawn tlan lut te dinhmun en leh an mamawhte a tul anga a hmuna enfiahin Parva-III an thleng phei a, raltlante (refugee) awm lailawkna hmun tlawhin Parva-III ah hian vantlang inkhawm (public meeting) hun an hmang nghal bawk a ni.

Minister te zin hian Parva-III-a refugee camp-ah hian sumfai bakah buhfai chawhmeh lam chi thahnem tak an hlan bakah tuilakna pipe leh silpauline, mutbu leh damdawi thahnem tak an hlan nghal a, khawtlang hruaitute nen pawh inkawmna hun neiin hmalak zel dan tur an sawiho a, an mamawh an lo sawi te pawh a tul anga sawrkarin a ngaihtuah zel tur thu an sawi bawk, Minister te va kal hian an thil hmuh dan leh a tul angte chu Aizawl lama sawrkar hotute a bik takin Chief Minister pawh an sawipui tur thu leh ruahmanna a rang thei ang bera rawn siam zel a nih tur thu an sawi bawk a, raltlan te pawh mahni inpui an thleng tih hria a thlamuang taka awm tura an duh thu an sawi bawk a ni.

Minister te hian raltlante chu harsatna awm apiang khawtlang hruaitute leh NGO te hrilh hre zel tur leh a tul dan anga SDO (Civil) Chawngte hnenah pawh an harsatna leh an mamawh thlen zel turin an chah bawk a. He hunah hian raltlante tana hmalakna kal mek tui khawlna PHE lamin an buatsaih leh thil tul dangte pawh en nghal a ni a. Sawrkar aiawha awm official hrang hrang te nen inkawmna hun an hmang bawk a ni. 

Minister te zin hi Lawngtlai DC remruatna angin SDO (Civil), Chawngte leh SDPO, Chawngte in an lo dawngsawng a ni.