1648/2022-2023
Aizawl, 18th August, 2022 : Vawiin khan Mizoram Taxation Department chuan Mizorama Bank hotute leh Mizoram sawrkar hnuaia DDO te chu Taxation Department Auditorium, MINECO- ah ko khawmin Goods & Services Tax(GST) chungchang inzirtirna leh inhrilh hriatna an nei a.

Chawhma hun hi Pu Kailiana Commissioner of State Tax in a kaihruai a, chawhnu lamah Pu R.Zosiamliana, Additional Commissioner of State Tax –in a hruai thung a. Zirtirna hi Pu C.Vanlalchhuana leh Pu Hrangthanmawia, GST Nodal Officer ten an neihpui a ni.

Taxation Department hotute chuan GST hi Mizoram sawrkarin a sum hmuhna ber a nih avangin theihtawp chhuaha hma an lak thu leh chhiah pe tha duh lo an awm thin avangin theihtawp chhuaha thawhpui turin Bank hotute leh sawrkar Officer-te an sawm a. Tun hnu ah chuan chhiah pe tha duh lo te chu an Bank account freeze sak te, an motor leh bungraw dang hren sak leh tihral sak thlengin a tul anga hma lak zel a nih tur thu sawiin anmahni thawhpui tha duh lo officer te pawh pawisa chawitir thlenga hremna a awm thu te an hrilhfiah a. Chhiah hi mipui pek khawm a nih avangin a nih dan tur dik takin sawrkarah a lut tur a ni a, chutiang a nih theihna tur chuan theihtawp an chhuah zel dawn tih Pu Kailiana Ralte, Commissioner of State Tax chuan a sawi a ni.

He GST zirtirna hunah hian Bankers leh sawrkar officer thahnem tak an kal khawm a ni.