259/2025-2026

Aizawl, the 22^nd April 2025 : Vawiin khan Secretariat Conference Hall MINECO ah India – European Union Water Partnership (IEWP) hnuaia Barak River Basin Management Plan duan dan tur chungchangah inrawnkhawmna Consultative Meeting neih a ni a. Meeting hi Chairman Brahmaputra Board Pu Ranbir Singh IAS (Rtd.) leh Chief Secretary Pu Khilli Ram Meena, IAS te kaihhruaina hnuaiah neih a ni.

Chief Secretary Pu Khilli Ram Meena chuan Barak River Basin Management Plan chuan Mizoram lui hrang hrang hrang – Tlawng, Tuivai, Tuivawl, Tuirial leh adt. a huam tel avangin he thil hi Mizoram leh heng lui hruala cheng mihringte tan a pawimawh hle dawn nia a lan thu sawiin inrawnkhawm hi a zau thei ang berah neih a tul dante a sawi bawk a ni. Chairman Brahmaputra Board, Pu Ranbir Singh chuan Barak River Basin Management Plan duan tur hian state engemawzat a huam tel avangin inrawnkhawmna chu state tin te nen buatsaih mek a nih thu sawiin Department hrang hrang ten tui leh lui chungchangah data leh chanchin an neih te chu he Plan duanna atan a tangkai hle dawn a, chuvangin Department hrang hrang te min tawiawm that hle a ngai dawn a ni, a ti.

Vawiin meeting hi India leh European Union ten tui chungchanga thawhhona an lo siam tawh India – EU Water Partnership bawhzuina hnuaia neih niin Barak basin (Tlawng, Tuivai, Tuivawl, Turial leh adangte) him zawk leh environment tichhe lo thei ang berah luipui tha tak leh chhawrtlak kan neih reng thei nana hna chi hrang hrang lo thawh thawh leh ruahmanna duan dan tur sawiho a ni a. Barak luipui leh a chhehvel humhalhna kawngah harsatna awm ang angte sawichhuah niin chungte sutkian nan he Plan hi a pawimawh hle dawn nia tarlan a ni a. Meeting ah hian tui kaihhnawih Department hrang hrang – Irrigation & Water Resources, PHE, Land Resources, Soil & Water Conservation P & E, UD&PA leh adt. chuan an hnathawh te sawiin he Plan duanna kawnga pawimawh nia an hriatte an sawilang bawk a ni.

Meeting khartu Er. Lalrothanga, Secretary, Irrigation & Water Resources chuan Mizoram luipui leh tui chungchangah he Plan hian kawngro thui tak a su thei dawn niin a sawi.

Meeting ah hian IEWP/GIZ Project Management Unit hotute chuan presention pe in Plan chungchang an sawifiah a, hetiang Plan an lo siam tawh leh kalpui tawh – Tapi Basin leh Ramganga Basin hnuaia hmalakna te an sawilang a ni.