258/2025-2026

Aizawl, the 22nd of April, 2025: Vawiin chawhnu dar 12:30 khan Pu Lalnghinglova Hmar, Minister of State, Sports & Youth Services Department hovin a office chamber-ah kumin kum tawpa khawpui chhunga mountain bike intlansiak, ‘Red Bull Aizawl Tlang Ruam Event’ buatsaih tum chungchang sawiho a ni.

Sports Minister Pu Lalnghinglova Hmar chuan Aizawl a ‘Urban downhill racing’ buatsaih leh tura hmalak a ni chu lawmawm a tih thu a sawi a. “Nikumah Aizawl Tlang Ruam event hlawhtling tak buatsaih a lo ni tawh a, a hautakin Red Bull tan pawh senso a tam hle ang tih ka ring. Chutih rualin khawvel mithmuhah Mizoram leh Mizote min phochhuak a, kuminah kalpui leh tum a ni hi lawmawm ka ti hle.” a ti.

Tourism Minister ni bawk Pu Lalnghinglova Hmar chuan sawi chhunzawmin, mountain bike-a intlansiak piah lamah event dang nen kaihkawpin, kum hmasa lam aia ‘festival’ lian leh rei zawk buatsaih a duh thu a sawi a. Mizoram mawina leh nawmna phochhuak lehzual tura her rem hret theih nia a hriat thu a sawi.

He hunah hian Red Bull atangin Pu Giridhar Narsaria, Field Marketing Manager chuan presentation a pe a. Nikum October 25-26 a Aizawl Tlang Ruam event-ah khan Asia ram hrang hrang panga atangin mi 22 an tlan a, Taiwan mi Chiang Shen Shang chu pakhatna a ni. Urban downhill khawvela langsar Tomas Slavik (Czech Republic) leh Pedro Burns (Chile) te chu mentor niin, inelna zawhah a rualin an tlan a, ennawm a tling.

Nikuma Aizawl Tlang Ruam event kha India rama ‘urban downhill mountain biking event’ hmasa ber niin, a kaihhnawih post hrang hrangte chu Instagram-ah view maktaduai 25 chuang a awm tawh. Print, visual leh social media danga tarlante nen chuan mi maktaduai 80-100 bawrin an hmu tura ngaih a ni. June thlaah minute 45 a thui documentary tihchhuah tum a ni bawk.

Kuminah pawh Red Bull Tlang Ruam event hi lian zawka kalpui tum niin, a kawng (route) pawh thui zawk leh harsa (challenging) zawka siam tum a ni a. Intihsiaknaa tel mai bakah mentor pawh nikum aia tam zawk neih tum niin, live streaming ti tur pawh biak fel tawh a ni bawk. A hun atan ruahtui hul hun November thla ruat chhin phawt a ni.