260/2025-2026

Dated Kolasib the 22nd April 2025: Vawiin khan Kolasib DC Pu Robert C Lalhmangaiha chuan Kolasib District Civil Pensioners Association General Conference 2025, Synod Conference Hall Diakkawn a neih chu a hmanpui.

He hunah hian Khuallian , Pu Robert C Lalhmangaiha chuan vawiina pensioner te hma a thusawi thei tura a awm chu lawmawm a tih thu a sawi a. Civil pensioner te chu hmalam eng tak thlir a beiseina nena ke pen ni a a hriat thu sawiin, a lawmawm hle a ni, a ti a.

An kum te uaithla lam tawh nimahse an beiseina erawh tithar zel turin a chah bawk.

DC chuan he hun hmang thei tura kalkhawmte chu Pathian thatna an chungah a lang nasa hle a,  chuvang chuan hma thar thlir a an ngaihtuahna te seng turin a chah a. An hlutna te tarlangin, khawtlang leh sawrkar tan an hlutna a chuai lova, an finna te leh an thurawn finthlak tak tak te chu an la tangkaipui hle a ni, a ti. Vawiina zirtirna an ngaihthlak tur pawh an tangkaipui ngei a beisei thu a sawi a, hmalam hun zelah pawh tul leh pawimawh a awm chuan DC hnenah pawh thlen hreh lo turin a chah bawk. 

Vawiina Mizoram Civil Pensioners Association, District Headquarters, Kolasib General Conference 2025 hmanna hi Pu B Lalremliana, President, MCPA Kolasib District chuan a kaihruaia. Pu Kevin Lalmalsawma, Treasury Officer hnena tangin First Formulation chungchangah zirtirna ngaihthlak niin,  Pu Chawnglianmawia Co Ordinator in Mizoram Health Care scheme chungchang a sawifiah bawk. Heng bakah hian thusawi tawi leh Report hrang hrang ngaihthlak niin, kum kalta chhunga mi 42 te sunna hun an hmang bawk a ni.

Secretary Report a a lan danin, Kolasib District ah hian an Association chhungah civil pensioner 1312 an awm a, Branch 14 a awm bawk a ni. Membership hi Annual, life leh Patron a thliar hran niin, Endowment Fund hi Branch 10 in an dawng bawk. Association Hruaitute hi Kum hnih danah an thlang thin a ni.

Dr C Lalmuankima, Vice President, MCPA Kolasib in lawmthu sawina a neih hnuin vawiin a General Conference hi tihtawp a ni.