Vawiin hian Serchhip Livestock Farmers' Cooperative Society chuan Ztu. C. Thansanga Sikul Mual, Bawngchawm khaw hluiah Special Assembly cum Krismas urlawk hun an hmang a, Pu C. Lalramzauva, Adviser to CM chuan khuallian niin a hmanpui.

Pu Ramzauva chuan thusawiin he hmun hi a naupan laia a khawsakna thin a nih thu a sawi a. A boruak a thianghlimin a nuam a, rambuai avangin 1967 ah pem chhuahsan a nih thu a sawi. He hmun hi cheibawla, khualzin hip thei tura ngaihtuahna hman a tul thu a sawi bawk. Ran vulhtute pawhin tun aia hmasawn tura tan la zel tur leh a hmunhma te ti hlu zel tura tan la tura chahin, taima tak leh remhre taka an beih zel chuan sawrkar atang pawhin tanpuina ala awm theih ngei a beisei pui thu a sawi bawk.

Pu C. Lalhminghlua, Secretary chuan report pe in he pawl hi kum 2015 atanga bul tan ani a,  a tirah member 22 awmin tunah hian member 16 an awm mek. Kel 70 vel nei thinin tunah hian kel 34 leh bawng lian 6 an nei mek a ni. He hmun hi Serchhip VC II hnenah a hman phalna an dil a, ran an vulh chhung chuan hman an phal sak thu sawiin, a hmunhma hi tun aia changtlung tura cheibawl tumin hma an lak mek thu a sawi.

President Pu PC Siamliana pawhin thu sawiin helai hmuna an ran vulhte hi nitin an tlawh thin a. Hlawhtlin ngei an tum thu sawiin, tunah chuan an thasen leh an sum hmuh erawh a la in hen lo hle nachungin theihtawpa hma la zelin Bawng lian chi vulh pun zel a, bawnghnute pawh hralh chhuah tur nei thei ngei tura hma lak zel an tum thu a sawi a, Kel pawh nasa lehzuala vulh pun zel an tum thu a sawi bawk. Ran vulhna hmun mai nilovin khualzin hip lut thei hmun nuam taka siam an tum thu a sawi bawk.

Pu C. Lalramzauva hian nakuma Paragliding Accuracy World Cup cum Grand Festival Serchhipa neihna tur Bawngchawm rama Dap zar kawna buatsaih mek chu a tlawh nghal a. He hmun hi India rama a tha ber pawl a ni a, a hmunah hian mi 39 riah theihna tur building cheng vaibelchhe 2.2 senga sak mek chu a en a, kum thar January chawlhkar hnihna ah chuan sak zawh hman beisei anih thu a sawi. Pu Ramzauva hi Pu J. Vanlalliana, President,  Mizoram Aerosport Association chuan a tawiawm a ni.

Attachment

  • Loading attachment...