Vawiin chawhnu khan Urban Development and Poverty Alleviation department hnuaia State Investment Programme Management and Implementation Unit (SIPMIU) hmalaknaa North East Capital Cities Development Implementation Programme (NERCCDIP) hmang a sak Aizawl Solid Waste Management Centre, Tuirial hawnna hun neih a ni a, Deputy Chief Minister Pu Tawnluia chu Khuallian a ni a Er Lalrinawma, Deputy Speaker, Dr ZR Thiamsanga, MLA, PU C Lalmuanpuia, MLA, Pu Zothantluanga, MLA, Pu PC Lalhmingthanga, Mayor, AMC, Dr C Vanlalramsanga, Secretary, UD&PA, department hrang hrang hotute leh Tuirial khawtlang hruaituten an telpui a ni.

Khuallian Pu Tawnluia, Deputy Chief Minister chuan Aizawl chu khawpui thang chak tak anih avanga bawlhhlawh pung zelin harsatna a siam loh nan kalphung mumal leh felfai tak neih a tul thu a sawi a, bawlhhlawh sawngbawl kawnga mipuitena kan zawm tur dan hrang hrang duan chhuah a nih thu leh chung dan zulzui a duan Aizawl Solid Waste Management Centre, Tuirial hman theih a hawn a ni chu lawmawm a tih thu a sawi. Deputy Chief Minister chuan bawlhhlawh thenfai chu sawrkar department pakhat bil mawhphurna a nih loh thu sawiin kan khawpui fainaa mawhphurtu pawimawh berte chu mitin kutah a awm thu a sawi a, Aizawl Solid Waste Management Centre hlawhtling taka a kal theih nan bawlhhlawh tawihthei leh theilo thliar hran kawnga tih tur kan neih te tha taka hlenchhuah a ngaih thu a sawi bawk a ni. Pu Tawnluia chuan khawvel thiamna hmanga khawl hmanga bawlhhlawh sawngbawl a thil tangkaia siamchhuah a ni tur chu lawmawm a tih rualin mitin ten kan nitin khawsak phung a bawlhhlawh siam tlem zawng a kan khawsak thiam a tul thu a sawi. Mizoram Chief Minister leh UD&PA department hotute thahnemngaihna avanga SIPMIU Project chhunzawm leh theih a ni chu Deputy Chief Minister chuan lawmthu a sawi a, Solid Waste management bakah Sewage management project pawh chak taka kalpui a nih thu leh hman theih a peihfel tep a nih thu a sawi bawk a ni.

Tuiriala Solid Waste Management Centre hawnna hi Dr. C. Vanlalramsanga, Secretary UD&PA in a kaihruai a, Er. Lalrothanga, Program Director, SIPMIU in technical report pein Pu PC Lalhmingthanga, Mayor, AMC in thusawina hun a hmang bawk a ni.

Aizawl Solid Waste Management Centre, Tuirial hi Cheng Nuai 3799.986 seng a sak a ni a, a satu contractor hi M/s V.Lalbiakzama, Venghlui, Aizawl a ni a, a sak hna hi ni 08.08.16 khan tan a ni. He Solid Waste Management Centre hi Hectare 13 a zau niin mi nuai 3.535 in an hman theih tur a sak a ni a, nitin bawlhhlawh Tonne 22 vel sawngbawl thei tur Vermi Compost Plant a awm bawk a ni.