2009/2026-2027

Lawngtlai, the 31st, August, 2026 : Vawiin chawhma dar 11:00 AM khan DC Conference Hall, Lawngtlaiah Bawrhsap Pu Donny Lalruatsanga kaihhruaiin Lawngtlai District chhunga 'Enforcement of Law and Order' chungchangah thutkhawmna neih a ni.

Pu Donny Lalruatsanga chuan kalkhawmte hnena lawmthu sawina a nei hmasa a. Ram leh khawthlang a lo hima, mipuite ralmuang taka an awm theihna turin Dan leh thupek kenkawh kawngah theihtawp chhuah zel a tul tak zet a ti a. Tun atanga inkhuahkhirhna tha taka kalpui a nih loh chuan nakin zelah harsatna lian zawk thleng thei a ni tiin, Dan leh thupek kenkawh kawngah District Administration - chuan theih ang angin dan palzût si lovin hma a la dawn a ni, a ti. Khawtlang nuam, zalen, ralmuang leh chhenfakawm zawk siam turin sawrkar, khawtlang hruaitute leh mipuite inkarah thawhhona tha tak a awm a tul tiin, Bawrhsap chuan thawhpuiah a sawm nghal a ni.

Thutkhawmah hian Lawngtlai District chhunga Foreigner - lut leh chhuak  khuahkhirh kawngah khauh zawka hmalak ni se tih a ni a, Ni1,September, 2026 atangin raltlan leh foreigner - te tan In luahtir phal tawh loh ni se an ti a ni. Hemi atan hian a tul angin Deputy Commissioner Office lamin thuchhuah lo siam  se tih niin, Hotel leh Homestay-ah pawh khauh zawka endikna kalpui ni se an ti bawk a ni. Lawngtlai District chhungah dik lo taka Certificate pek chhuah a awm tawh loh nan hmalak ni se; Certificate - diklo siam leh pe chhuak thinte man chhuah a, dan anga hrem ni se tih niin, DC Office leh CYLA - ten lo bawhzui se an ti a. Chak leh tha zawka Ruihhlo do kalpui a nih theih nan leh, a tisualtu leh pawikhawihtute dan anga hrem anih theih nan Police leh YLA - ten theihtawp lo chhuah se tih a ni.

Lawngtlai District chhungah lirthei chetsualna leh intihpalhna a tlem theih nana  hmalak tha tih niin, September thla hi 'No Tolerance Month' ah puan ni se; Police, Traffic Enforcement leh Transport Department LADC - te inrawn tlangin hmalak ni se, DTO lamin thuchhuah siam se tih a ni bawk. Khawpui chhungah 30km/hr aia chaka lirthei tlan phalloh ni se tih niin, Awareness Campaign - pawh a tam theih ang bera neih ni se tih a ni bawk. District Magistrate atanga Khapna thuchhuah thinah chak zawka bawhzui a tul tih pawm tlangin, Sawrkar, VC, NGOs leh Enforcement - lam ten ngaipawimawh thara, a bawhzui kawngah thawhho ni se an ti a. A bik takin Village Council - te khawtlang enkawltu an nih angin, khapna thuchhuahte tha taka bawhzui leh hmala tura sawm an ni bawk.

Vawiin thutkhawmah hian Project Director (DRDO); Commandant, 3rd IR Bn. Thingkah; SDO (C) Sangau; SDPO; DTO; Transport Officer (LADC); Inspector, Statistics; Enforcement; CYLA, MHIP, LWA aiawh, President MJA, President & Secretary ( VC leh YLA Branch Lawngtlai Town) an tel a, Bawrhsap chuan lawmthu sawiin thutkhawm a khar.