2008/2026-2027

Lunglei, 2026 Thlazing ni 31: Vawiin khan Lunglei District Level Coordination Committee (DLCC) on Civil Registration System (CRS) chu an Chairman, District Bawrhsap leh District Registrar of Births & Deaths Pi Navneet Mann hovin a hna thawh pindanah an ṭhu khawm.

Bawrhsap Pi Navneet Mann chuan birth certificate leh death certificate chu lehkha pawimawh tak takah finfiahna atana hman ṭhin a nih avangin a pek chhuah kawngah fimkhur a ṭul thu a sawi a. A bikin pian/thih ni aṭanga kum khat liam tawh hnua birth/death certificate diltute chuan District Magistrate phalna neih hmasak a ngaih avangin chuti anga dilna lut chu uluk taka endik tur leh an lehkha thil telte a dik ngei em tih ngun taka finfiah hmasa ṭhin turin thawktute a chah.

Member Secretary, Lunglei District Research Officer leh Additional District Registrar of Births & Deaths, Pu PC Vanlalrova chuan report hrang hrang a sawi a. Lunglei District-a piang leh thi chhinchhiahna kalpui dan thlir ho niin, felfai leh ṭha zawka hma lak dan tur rawtnate sawi ho a ni.

He ṭhut khawmah hian piang leh thite chu ni 21 ral hmaa CRS-a chhinchhiah fel leh thuneitute hnena report tur tih a nih angin Lunglei District chhunga sawrkar leh private damdawi inte dinhmun thlir ho niin, he inkaihhruaina hi ṭha taka an zawm zel theih nana hma lak dan tur sawi ho a ni a. Birth certificate leh death certificate diltute'n awlsam taka digital copy an hmuh theih nan an dilnaah phone number leh email ID tar lan tel a pawimawh thu sawi lan niin, piang leh thi chhinchhiahna bu hluite pawh digital record siam chhoh mek a nih thu leh digitised certificate pek chhuah zel a nih tawh thu sawi lan a ni a. Birth certificate leh death certificate lem siam leh tihdanglam chu dan phal loh a nih angin a venna tur leh certificate lem laka mipui himna tura hma lak dan tur te, inzirtirna hrang hrang kalpui dan tur te sawi ho a ni bawk.

Lunglei District-a piang leh thi chhinchhiah hi Lunglei Municipal Council (LMC) huam chhungah chuan LMC-in kalpuiin, LMC pawn lam zawngah District Research Officer (Additional District Registrar of Births & Deaths), Lunglei chuan a kalpui thung a. Tun dinhmunah DRO hnuaiah piang leh thi chhinchhiahtu, local Registrar of Births & Deaths (RBD) 104 awmin, kumin 2026 chhung (August thla thleng)-in nau piang 713 leh mitthi 130 chhinchhiah tawh a ni a. LMC huam chhungah local RBD 24 leh damdawi in 7, a zavaiin RBD unit 31 awmin, kumin 2026 chhung (July thla thleng)-in nau piang 868 leh mitthi 319 chhinchhiah tawh a ni bawk.

Birth/death certificate hi pian/thih ni aṭanga ni 21 chhungin Registrar of Births & Deaths (RBD) hnenah a thlawna lak theih a ni a; ni 22–30 inkarah ₹20/ chawiin RBD aṭangin lak theih a ni a; ni 31–365 inkarah chuan District Research Office/Additional District Registrar of Births & Deaths (ADR) office-ah fee ₹50/- leh application form man ₹20/- (a vaiin ₹70/-) chawia lak a ngai a; kum khat chin hnu lamah chuan District Magistrate/Executive Magistrate hriatpuiin fee hrang hrang a vaiin ₹220/- chawiin Delayed Certificate lak chhuah theih chauh a ni.