Vawiin chawhma hian Lawngtlai District Bawrhsap Pu. J.Hmingthanmawia chuan nizan zanlaia chhimtuipuia chesual Tv. Vanlalmawia Fanai ruang zawng mektu mi tlawmngai te chu a hmunah tlawhin an mamawh tur bungrua engemaw zat a pe.

Tv. Vanlalmawia hi Lunglei farm venga cheng niin Forest Department, Lawngtlai  District ah hian Forester hna a thawka. Kolodyne Hydro- Electricity Power Project kalpui mekah Environment and Forest Clearance chungchanga survey neiin a thawhpuite nen  Vartek leh a chhehvelah han kalin nizan zanlai vel khan Chhimtuipui lei (Saiha kai)  hi thlengin an ding khawmuang a, hetia an din khawmuan chhung zawk hian lei (bridge) atang hian chesualin a hnuai feet za leh pahnih zeta sangah chuan a tla ta ani, a chhehvela a hriate sawi danin a tlakna li pawh hi tuning fur lai chuan patling hlam nga vel zeta thuk a la ni bawk.

Chhiattawh thu hriat a nih ve leh hian a chhehvela khawsa mi tlawmngai engemaw zatin a ruang zawn hna an thawk nghal a, Kawlchaw West ah Information Centre siamin  Central YLA, MTP leh a thawhna Department bakah mi tlawmngai engemaw zatin  chawllovin ruang zawn hna hi an chhunzawm reng ani.

Bawrhsap hian ruang zawngtu mi tlawmngaite hman turin Silpouline pali, Life Jacket engemaw zat leh thingpui lumna tur pawisa fai Rs 2500.00 a pek bakah a tul ang zel  thildang pawh ngaihtuah a nih tur thu a sawi a. Ruang zawn hna thawka theih tawp  chhuahtu mi tlawmngai tam tak kal khawmte chungah lawmthu sawiin tuilian kara huaisen taka an beihna chu a fak a ni.

Ruang zawngtute tan hian mi thilphal ten sum leh pai bakah eitur chi hrang hrang engemaw zat an thawkhawm bawk.