Nimin khan Dr. Lalrozama, IAS Serchhip Bawrhsap chuan Sainik School sak mek, Chhingchhip ami chu a hmunah kalin an hnathawh te a enfiah.

Sainik School hi kumin 2017 Academic Session atanga hawn tan tum niin, Pawl VI zirlai naupang an la dawn a. School Session tan hma hian hna tul zualte thawh zawh hman ani dawn em tih hi Bawrhsap chuan a enpui a ni. Class room, Principal Office leh chenna in, Registrar Office turte, Hostel tur leh Mess turte tlawhin heng buildingte hi sak zawh thawkhat an ni tawh a. Luah theih tura chul mam ngai erawh an la ni hlawm a ni.

School bul tanna atana tul hmasa tur Elelctric Supply leh Tui Supply dan tur te pawh en nghalin Power House tur pawh sak zawh tep a ni tawh a, Tui supply na tur pawh sawrkarin pawisa a pek veleh PHE Department te chuan an khawih chhunzawm nghal tur thu an sawi bawk.

Sainik School sak hna thawktu Hindustan Prefab Limited hotu ten Bawrhsap hi an lo dawngsawng a, an hna kal mekte chu engemaw zat thawh zawh tawh niin February thla chhunga zawh fel vek hman an tum thu an lo hrilh a. Bawrhsap pawhin chak taka hma la chhunzawm zel turin leh a hun taka School tan a nih theih a beisei thu a sawi a, hnathawktute chu a tulna apianga tanpui a inpeih thu a hrilh a ni.

Bawrhsap hi PHED leh P&E Department hotuten an tawiawm a ni.