Vawiin khan Lawngtlai DC Dr A. Muthamma IAS chuan Lawngtlai DC Conference Hall-ah Lawngtlai District chhunga Constituency pathuma Final Electoral Roll a tlangzarh.
Dr A. Muthamma chuan Electoral tlangzarh theiha peih fel a ni chu lawmawm a tih thu sawiin, India khua leh tui, Roll-a chuang zawng zawngte'n an mawhphurhna ngai pawimawh a, vote thlak huna vote an thlak vek theih nana hma la turin political party ai awh kal khawmte chu a ngen a ni.
Vawiina Final Roll tlangzarhna hun hi SDO Sadar Pu Lallawmawma'n a kaihruai a. Party ai awh kal khawm atangin Tuichawng biala voter pung hluai chu en chian a that thu sawi lan niin, Tuichawng bial hi Bangladesh nena inrina lai a nih avangin heti taka voter an pun zel chuan ram leh hnam humhalhna kawngah pawh harsatna thleng thei a nih avangin en zui ngei ni se an duh thu an sawi a. Thuneitu lam pawhin a theih anga lo bawhzui a, BLO-te pawh lo sawipui an tum thu leh helai bial hi fimkhur zawka ennawn ni se an duh thu an sawi ve bawk.
Final Publication of Electoral Roll 2017-a a lan danin, Lawngtlai District chhunga Tuichawng Constituency-ah voter 28771 (mipa 14553 leh hmeichhia 14218) an awm a; Lawngtlai West Constituency-ah voter 25115 (mipa 12603 leh hmeichhia 12512) awmin, Lawngtlai East Constituency-ah voter 22763 (mipa 11005 leh hmeichhia 11758) an awm bawk. November 2016-a tlangzarh Draft Roll leh tun tuma Final Roll tlangzarh-a voter inthlauhna hi Tuichawngah 836, Lawngtlai West-ah 462 leh Lawngtlai East-ah 150 a ni.
