3940/2024-2025
Dated Serchhip the 24th January, 2025 : Beti Bachao Beti Padhao (BBBP) kum 10 tlin champhaphak leh National Girl Child Day lawmna programme, January 21 a bultan chu vawiin khan Serchhip DC Pu Paul L.Khuma’n Serchhip DC Pisapui Hall a program buatsaihah a khar.
DC Pu Paul L.Khuma chuan hmeichhia te chhanhim leh zirtir kawnga hma kan sawn theihna turin BBBP leh National Girl Child Day hman thin a ni, a ti a. India ram State dangah chuan inneihnaa hmeichhe thuam chhawm (dowry) hautak lutuk avang te leh hmeichhe rahbehna a la nasat em avangin hmeichhe fa tihhlum leh nu in nau a pai laia tihthlak a hluar hle thin a, heng thil rapthlak tak te avang hian Sawrkar Laipui chuan hmeichhiate chhanhim leh an dinhmun chawikan a tulzia hriain he hmalakna hi a kalpui a ni, a ti. DC chuan Mizo khawtlang nunah ngei pawh hmeichhia aia mipa dahsan zawkna thinlungpu kan la tam a, hmeichhiate dinhmun chawikan a tulna lai a la tam em em a ni, tiin BBBP leh National Girl Child Day ah hian ngaihtuahna thar pu a, mi dangte zirtir chhawngtu nih tum turin kalkhawmte a chah a ni.
Beti Bachao Beti Padhao (BBBP) kum 10 tlin champhaphak leh National Girl Child Day lawmna ni 4 chhung hian event hrang hrang neih neiin, College zirlaite zingah Quiz Competition leh Public Speaking Competition buatsaih a ni a. Vawiin programme ah hian lawmman sem a ni. Lawmman dawngtute chu-
Quiz Competition:
1st Prize: Lawmsangzuala, 4th Sem. B.A leh Vansangpuii, 4th Sem B.Sc.
2nd Prize : Lalhunmawii, 2nd Sem. B.A leh Lalrohlui, 2nd Sem. B.A.
3rd Prize : Lalramtiami, 2nd Sem. B.A. leh Lalpekhlua, 2nd Sem. B.Sc.
Public Speaking Competition:
1st Prize: Maria Zomuanpuii, IInd Sem. BA
2nd Prize: Lalnghakliani, 4th Sem BA
3rd Prize: Vanlalawmpuii, 4th Sem. BA
Heng bakah hian Save the Girl Child tih hnuaiah Serchhip District atanga infiamna kawnga chawimawi tlak mi pahnih - Lalrempuii (Badminton), Serchhip leh Lalthantluangi (hockey), Kanghmun “S” te chu lawmpuina hlan an ni bawk.
Vawiin programme hi DPO charge la tu Pu James Lalremliana’n a kaihruai a. Govt. Serchhip College Principal Pu C Laldintluanga pawhin thu a sawi a ni.
