3941/2024-2025

Aizawl, the 24th January 2025 : Republic Day, 2025 chu India ram hmun dang ang bawkin January ni 26, 2025 (Pathianni) hian Mizoram hmun hrang hrangah hman tum a ni a. Aizawl-ah chuan a lawmna pui ber chu A.R Ground ah khuallian Mizoram Larsap Gen (Dr) VK Singh, PVSM, AVSM, YSM (Retd) hovin hman a ni dawn.

Zing dar 7:28 ah Aizawl Republic Day Programme hmanna tur pui ber A.R Ground-ah Khuallian a thleng ang a, Hnam Puanzar a pawhparh hnuah Parade Contingent enfiahna neiin, Republic Day pual lawmna March-Past in a chhunzawm ang. Governor hian Republic Day thuchah a sawi zui ang a. National/State Awards leh lawmman dangte semin a chhunzawm leh ang.

Chawhnu dar 12:30 PM ah Governor chenna Raj Bhavan ah sawm bikte tan thingpui ruai buatsaih a ni ang.

A.R.Ground-a Republic Day lawmna hi TV ah DDK (DDK Aizawl), ZONET (Zawlbuk) leh LPS (LPS1) in live in an tichhuak ang a. An Youtube Channel ah theuh Live a pekchhuah a ni bawk ang.

Republic Day pual hian zing ni chhuah rualin Sorkar building hrang hrangah Hnampuan zar a ni ang a. Sakhaw hrang hrang hnenah India ram leh mipuite tana tawngtai sak tura ngen an lo ni tawh bawk.

Republic Day, 2025 lawmnaa tel tur hian mipui a duh apiang sawm an ni.