Nimin (2.12.2016) chawhma khan Baptist Church of Mizoram Pastor Conference 2016, Sap Upa leh Pu Buanga Hall, Serkawn, Lungleia neih mekah Health Department hmalaknain HIV/ AIDS chungchang inzirtirna hun buatsaih a ni.
He hunah hian Health & Family Welfare Minister Pu Lal Thanzara pawhin thu sawiin Pastor Conference 2016-a lawm taka hun an pek avang leh thawhhona kawnga an in hawng avangin lawmthu a sawi a. HIV/AIDS hian nasa takin min run ta a, kan ram leh hnam mi leh sa te harsatna a nih miau avangin Kohhranin tih tak zeta hma a lak chuan awmzia a nei thei ang tih hria in rawngbawltute pun lo theilo dinhmunah kan ding ta a ni, a ti a. Tuna kan hun tawn mek kan hmachhawn dan hian thui takin kan Zoram dinhmun a hril dawn a, chuvangin ram leh kohhran hruaitu tha tak tak kan chan tur te kan chan zel loh nan vawiinah hian tih tak zeta hma kan lak a ngai a ni, a ti. Kohhran huang chhunga pawl hrang hrang ten tun aia chak zawka hetiang kawnga zirtirna an neih pui theih chuan kan lawm hle ang, a ti bawk.
Health Minister hian MSACS leh a thawhpui tlawmngaipawl te buatsaih, HIV/ AIDS chungchanga Pastors’ Handbook on Harm Reduction, ‘Hnuhpui’ lehkhabute a tlangzarh nghal a ni.
He hunah hian MSACS Project Director Dr. Lalmalsawmi Sailo chuan presentation pe in Mizorama HIV/ AIDS vei dinhmun tlangpui a tarlang a. Mipui mimir ah HIV/ AIDS vei kan tam tawh avangin department mal a beih chi a ni lova, Mizo tawh phawt chuan kan do a ngai a, kohhran hi a huang tha berte zing a mi a ni, a ti a.HIV/ AIDS dona kawngah awareness hi kan nei tha tawk a tih theih loh a, thangthar an awm zel avangin a kal reng a ngai a ni, a ti. India ramah HIV/ AIDS vei a percentage zawnga chhiarin pahnihna ni mah ila, tih tak taka kan beih chuan kan tihniam thei a ni, a ti bawk.
