2260/2024-2025

New Delhi, 27^th September, 2024 : Ministry of Tourism, Govt of India in World Tourism Day denchhena a buatsaih ‘Best Tourism Village Competition 2024’ ah Sialsuk khua chuan category 5 zinga pakhat "Community Based Tourism" ah Best Tourism Village lawmman an la a, lawmman hi vawiina World Tourism Day lawmna New Delhi a neihah Jagdeep Dhankhar, Vice Presisent of India leh Gajendra Singh Shekhawat, Union Minister, Tourism and Culture te chuan an hlan a, Bialtu MLA Baryl Vanneihsangi Tlau leh Dr. Lalrozama, Secretary Tourism ten Sialsuk khaw aiawhin an dawng a ni. He intihsiakna ah hian State 30 atangin khaw 991 an inlan a, chung khaw 991 te chu category hrang hrang pariat (8) ah thliar leh niin chuta tang chuan  khaw 36 te chu lawmman la tura thlan chhuah leh an ni.

World Tourism Day 2024 lawmna hi Vigyan Bhawan, New Delhi ah neih ni in Vice President of India chu khuallian a ni.

Sialsuk khua ah hian mi cheng 2370 awmin, chhungkaw 27 in tourism kaihhnawihin ei an zawng a ni. Tourism atanga sum lut za a sawm hi an khaw Health Care tih changtlun nan an hmang thin a ni. Sialsuk ah hian homestay 10 awmin khum 30 a awm a, kum khat chhungin mi 15000 atanga 20000 vel in Sialsuk hi an tlawh thin anga chhut a ni. Siaksuk Village Council kaihhruaina in Sialsuk Tlang Committee (Sialsuk Ecotourism Development Committee) din a ni a, anni hian tourism tih hmasawnna tur kawng hrang hrang an dap thin a ni.

Best Tourism Village Competition hi kum 2023 atang khan Ministry of Tourism hian World Tourism Day denchhenin a buatsaih tan a, a hmasa ber atan Reiek khua in Best Tourism Village an lo la tawh bawk a ni.

Pi Baryl Vanneihsangi  Tlau leh Dr. Lalrozama, Secretary Tourism te hi Mizoram atangin Pi Rachel Lalrinhlui, Deputy Director, Tourism,  Pu R. Lalruatkima, Village Council President leh Pu Lalmuanchhana, Village Council Member Sialsuk ten an tawiawm a ni.