Vawiin hian Serchhip DC Conference Hall ah Beti Bachao Beti Padhao Programme (BBBP) hawnna neih a ni a, Pi Sangchhin Chinzah, Bawrhsap chu khuallian niin he Progrmme hi a hawng.

Ministry of Women & Child Development, Government of India hnuaia India rama kalpui, Save the Girl Child, Educate the Girl Child Programme (fanute chhanhimna & inzir puitlin tirna Programme) hi a thawh hnihnaah Serchhip District-a kalpui ve tura tih a nih angin, District Task Force din a ni a, chu Task Force chuan Action Plan siamin, Action Plan chu Central lamin an rawn pawm saka, Programme atana Fund an dah Rs. 50 lakh atangin a zatve 25 Lakh an rawn pechhuak nghal a ni. Chumi hmang chuan Serchhip District ah Hmeichhe naupangte venhim, zirtir leh hmeichhiate chawisan (empower) a tulna Campaign chi hrang hrang hmalakna kum2018-19 chhung hian an kalpui dawn a ni.

He programme hawnna inkhawmah Bawrhsap Pi Sangchhin chuan, India ramah, State tam takah, hnam tam takin hmeichhe fa an duh lohva, an pian hmaa tihtlak mai mai an chin avangin vawiinah chuan nupui tur pawh an indaih tawh lova. Human Trafficking thlengin a hring chho mek a ni, a ti a. Mizoram chu kan dinhmun a tha a, amaherawh chu kan inhrilh thara kan fanute zirna lamah te, kawn g dang dangah kan chher sauh sauh zel a ngai a ni, a ti. Khuallian hian BBBP Serchhip District Cartoon tlangzarhna a nei a, District chhunga Sub Centre thlanchhuah 7, PHC hlat zualte hnenah nau neihna/ nau chharna hmanrua semin, Serchhip khawpui chhung MHIP Branch hrang hrang 17 te hnenah naupuan set hnih theuh a hlan nghal bawk. MHIP te hian an Branch huam chhunga hmeichhe naupiangte chu naupuan hian – an lo lawmin an lo pawm a ni tih entir nan an lo en thin dawn a. District chhunga MHIP zawng zawngte naupuan hi pek vek tur a ni.

He hunah hian Pu Lalhruaitluanga, MCS Nodal Officer BBBP chuan BBBP sawifiahna a nei a. He Programme Local Champion atana thlan Pi Lalrampari, Chief Coach, Hockey Academy, Thenzawl chuan fuihna thusawina hun a nei bawk.

Vawiina BBBP Kick-Off hi Dr. Laldawngliana Sailo, CMO Serchhip in a kaihruai a ni.