Vawiin chawhnu khan Chief Minister Pu Lal Thanhawla chuan Rs. 819.30 lakhs senga sak PWD Chief Engineer (Highways) Office Building thar, PWD Complex, Tuikhuahtlang a mi chu a hawng.

Chief Minister chuan Public Works Department chu sawrkar inrelbawlna a department pawimawh ber pawl a nih thu leh hmasawnna ruhrel pawimawh tak tak siam a thawk thintu an nih thu a sawi a. An mawhphurhna a san avangin thawktute pawh discipline tha tak vawng chunga rinawm leh thahnemngai taka thawk thin turin a chah. Khuallian chuan Mizoram hmun hrang hrangah kawngpui tha lai awm mahse kawng zawng zawng a tha rual vek theilo a, chhan hrang hrang zingah ruah sur nasat avang leh hnathawhna hun a tam tawk thin loh avang te a ni a, a hmangtute pawhin a bik takin khawpui chhungah chuan an dimdawi thiam a tul thin bawk a ni, tiin kawng siam leh a enkawl zui hna thawktu PWD te chuan an hmabak a tam avangin chona ah la a, tang leh zual zawka thawk thin turin a chah. Chief Minister chuan "mipui tan a thawk kan ni tih inhre reng chungin kan theihna zawng zawng nen kan tih tur chin theuh tlin taka kan thawh a pawimawh a ni," a ti a.  Building thar tha tak an nei chu lawmawm a tih thu sawiin fai leh dimdawi taka vawng zui zel turin office thawktute a chah bawk.

PWD Chief Engineer (Highways) office building thar hi July 2016 atang khan a sak hna thawh tan niin September ni 29, 2018 khan zawh a ni a. A sakna hi Special Plan Assistance atanga sum hmuh a thawh tan niin, SPA a tawp hnu ah SPP hnuaia thawh chhunzawm leh niin, chhawng nga a awm a. Ground Floor chu lirthei 16 lenna car parking leh choka atan duan niin, First floor chu 2-wheeler 70 dah theihna parking area a siam a ni a. Second floor leh Third floor te chu office room hrang hrang atan hman niin a chung ber fourth floor ah Conference Hall siam a ni. Passenger 13 lenna Lift la dah tum a ni a. Building thar hi a total floor area chu 2209.42 sq.m a ni.

PWD office building thar hawnna inkhawm hi Er. R Vanlaltluanga, Engineer-in-Chief, PWD chuan kaihruaiin, Er. R. Lalrintluanga, Chief Engineer, PWD (Buildings) chuan Technical Report a pe a. Chief Engineer (Planning) Pu Bowman chuan lawmthu sawiin programme hi a khar a ni.