Kumin Mizoram Inthlanpui hmachhawn tur atan inbuatsaihna chu Mizoram State Chief Election Officer, Pu S.B.Shashank, IAS kaihhruaina hnuaiah  chak takin kalpui mek a ni a. Vawiinah pawh ATI Training Hall, Aizawl-ah state chhunga political party hrang hrangte tan ‘Orientation-cum-Interaction of Political Parties for General Elections to Mizoram Legislative Assembly 2018’ neih a ni.

Orientation-cum-Interaction hi Dy.CEO Pu H.Lianzela’n a kaihruai a;  Addl.CEO Pi Lalzarmawii’n Training-a tel political Party aiawh rawn kal zawng zawngte lawmna thu a sawi a. Orientation-cum-Interaction hawngtu CEO Pu S.B.Shashank chuan thu sawiin state inthlan tur atan kawng hrang hrangin buatsaihna chak taka kalpui a nih laia political party-te hnenah Election Commission guidelines hrang hrang inhrilhfiahna hun tha tak an nei thei chu a lawmawm hle a ni, a ti a. Inthlan felfai leh dik taka awmna thin hmun tia khawvel hriathlawh Mizoram State chu kumin inthlan lo awm turah pawh a hma ang bawkin ramchhung state dangte leh rampawn a mite tan pawha entawntlakin state elections neih ngei tum tur a ni, a ti bawk. Kumin election-a thil thar an hman tur ‘Suvidha-Single Window Permission System’ chungchang pawh vawiin Orientation-cum-Interaction ah hrilhfiah an nih tur thu sawiin CEO Pu Shashank chuan political party ten public meeting an huaihawt duh chuan he Suvidha-ah hian dilna an thehlut hmasak a ngai tawh dawn a ni, a ti. Media Certification & Monitoring Committee (MCMC) pawh District zawng zawng bakah State level-ah pawh din a ni ang a, District MCMC-in an hnawl chu State MCMC-in a ennawn leh thei ang a, chung chungah chuan Appellate Authority pawh dah a ni tawh, a ti bawk. ECI chuan Candidate pakhat zelin inthlan atana a senso zat tur a phal/bituk sak chu cheng nuai 20 a ni a, Candidate-te chuan chawhma dar 11 atangin tlai dar 3 chhung nomination file hun hawnsak an ni ang, a ti a. Inthlan ni puan a nih veleh Model Code of Conduct hman nghal a nih tur thu sawiin CEO chuan Minister-te thusawi lai emaw an thlalakte chu sorkar department hrang hrang website-ah a lang tawh tur a ni lo, a ti bawk. ECI chuan election chhung zawnga state inthlan boruak vil tur General Observer leh Expenditure Observer tur engemawzat a rawn tir leh dawn bawk a ni, a ti.

Vawiin Orientation-cum-Interaction-ah hian Political Parties aiawhte chu hengte hi zirtir an ni :

1). Candidate’s Nomination Process - Pu H.Lalhmingthanga, SLMT, Dy. Secretary, SAD/DP&AR

2). Election Expenditure Monitoring - Pu Vanlalrova, SLMT & Dy. Director, SYS

3). Suvidha-Single Window Permission System - Pi H.Vanlalruatfeli, Programmer, Election Dept.

4). Media Certification & Monitoring Committee - Pu Vanlalrova, SLMT & Dy. Director, SYS

5). Model Code of Conduct - Pu Vanlalrova, SLMT & Dy. Director, SYS

Nimin October ni 4, 2018 (Nilaini) khan District Election Officer, Lawngtlai District huaihawtin DC Conference Hall-ah EVM/VVPAT hman dan inzirtirna leh election slogan & hla inphuahsiak lawmman semna hun hman a ni bawk a. He hun hi Election Officer Pu Lalrinawma-in kaihruaiin sikul naupang kalkhawmte chu electoral roll-a inziah luh a pawimawhzia leh vote thlak pawimawhzia a hrilh. EVM/VVPAT chungchang hriat tur tulte hrilhfiahin a hman dan a zirtir a. Lawngtlai DIPRO Pu C.Lalhruaitluanga pawhin thu sawiin India chu mipuite rorelna a nih angin inthlan hi a apwimawh em em a, zirlai leh thalai zawkten ramchhunga inthlan kalpui a nih thin dante an chik ve a ngai a ni, a ti. Election slogan inphuahsiakah MC Lalnunmawia, AOC Veng chu pakhatna niin, mi 4 hnenah consolation prize hlan a ni bawk a. Election theme song inphuahsiakah hian A. Lalzara, Council Veng chu pakhatna niin mi 2-in consolation prize an dawng bawk. Hun hman zawh hian EVM/VVPAT demonstration neihpui a ni a, kalkhawmten vote an thlak chhin nghal a ni.

Nimin vek khan Serchhip  District chhunga Police-te chuan Mizoram Legislative Assembly  Election 2018 lo awm tur atana inbuatsaih nan SP Conference Hall-ah ‘One Day Course on  Police Training On Assembly  Election’ chu a vawi hnihna atan neih a ni a. He hun hi session hnihah then niin hun khatnaah hian  Pu Ngurthansanga, SDC leh Master Trainer, DEO Office Serchhip hnen atangin ‘Systematic Voter’s Education & Electoral Participation’ (SVEEP) chungchang leh inthlanna kaihhnawiha Voter-te hriattur pawimawh hrang hrangte inhrilhfiah a nih bakah inthlanna hmanrua Electronic Voting Machine (EVM) leh  Voter’s Verified Paper Audit  Trial (VVPAT) te rintlak a nihzia a taka enchhinna/vote thlak chhinna  (Demonstration & Mock Poll) neih  a ni bawk. 

Session 2-ah  Chief  Medical  Office  lam atangin  Election chhunga  taksa lam harsatna  hrang hrang lo thlen palha chetlak dan tur ‘First Aid & Emergency Response’ chungchang zirho a nih hnuah Serchhip S.P. Pu R.Sathiyasundaram-in lawmthu sawiin Training hi khar a ni. Serchhip Police te hian thla hmasa September ni 13 leh 14  khan Election Training hi lo nei tawhin vawiinah pawh Serchhip Police Station leh District chhunga Police Station  hrang hrang atangin Police Officer te an tel tha hle a ni.