Bharat Nirman Public Information Campaign thawh 10-na chu vawiin khan Khawzawl Zaingen Community Hall-ah neih a ni a. Campaign ah hian Central Sorkar Schemes leh Programme chi hrang hrang kalphung leh hnathawh dante chu Mizoram-a kalpuitu Deptt mithiamten mipui pungkhawmte an hrilhfiah a ni.

 

 

He hun hmanpuitu Health Minsiter Pu Lalrinliana Sailo chuan hmasawnna kawnga chak taka ke pen thei tur chuan mipui mimirte suk thlek tih hmasawn hmasak a tul a, Central Sorkar in ram mipuite hmasawnna tura ruahmanna chi hrang hrang a siamte pawh a chhawr tangkaitu tur mipuite’n a nih dan tur ang taka chhawr thei turin, a kalphung leh hnathawh dan te hriat a tul a, ‘Kan chanvo tur kan chang em? Kan tih ve tur kan lo ti reng em?’  tih te hi Mipuiten ngaihven nachang kan hriat a hun tawh a ni a ti.

NREGS Mizorama kalpui dan chu Central Sorkar duhdan nen chuan inanglo deuhva a hriat thu pawh sawiin, Pu Lalrinliana Sailo chuan mizote rilru hmanhmawh-na chuan, thawh keuh keuh lam ai chuan, kawngpuite pawh laih tlang zung zung a duh thin a, JCB te ruai-in hei hian mihausa te kutah sum a luh tir thin a, hei hi Central Sorkar duhdan nen chuan a inanglo a ni a ti.

Health Minister chuan khawtlang hruaitute leh mipui tawiawmna nen chuan Mizo mipuite hriselna dinhmun chu nasa taka tihhmasawn theih a ni dawn tih a sawi a, Health Worker te hian thla khatah vawi 2 tal a bial chhung mipuite kan kual in an hriselna dinhmun a report thin tur a ni a, hetiang bawk hian mipuite hriselna dinhmun enkawlna kawngah ruahmanna chi hrang hrang duanchhuah a ni a, hengte hi tha taka zawm vek chu nise, natna chi hrang hrangte hi kan umbo thei dawn a ni a ti a, tunlaiin khaw thenkhat, Doctor MBBS pangngai hnualsuat-a Specialist deuh kher ngen ching an awm tih pawh sawiin, hei hi thil awmze nei lo a ni a, Doctor kan neihte thiamna hi an rin tlak em em vek a ni a ti.

NLUP chungchang pawh sawilangin, Pu Lalrinliana Sailo chuan NLUP dawngtu tur thlan hmasak ah za-a 60 laiin Ar leh vawk vulh an lo thlang a, hetiang a nih chuan a hralhna kawngah harsatna lian tak a thleng ngei dawn tih a hriatsa a, tunah hian ruahmanna siamfel ngaite bawhzui leh mek a ni a ti.

Hemi hnu hian Khualzahawm, Champhai DC Pu Vijay Kumar Bidhuri pawhin thu sawiin, khawpui leh thingtlanga cheng ten rualkhai taka hmasawnna an neih theih nan, Thingtlang mipuite tan bik Bharat Nirman Programme te hi duanchhuah a ni a ti a,  hetihrual hian thingtlang mipuite dinhmun chawikanna tura Central Sorkar Scheme duanchhuah chi hrang hrang te hi a hmangtu mipuiuten kan hman thiam loh chuan kan harsatna ata min chhanchhuaktu aiin, harsatna nasa zawk min thlentu a ni thei bawk a, NREGS te pawh mipuite thatchhiatna-a hruailuttu a ni palh thei a ni a ti.

Khualzahawm dang, Khawzawl Joint Village Council President Pu Lalngurliana pawhin thu a sawi a, hawnna inkhawm zawh hnu-ah technical Session hmang chhunzawm in, Central Sorkar Schemes hrang hrang, IAY, PMGSY, NREGS, SSA, RTI, NRHM leh a dangte chu a kalpuitu Deptt.-a mithiam thlanchhuah ten sawifiah-in mipui lam atanga zawhna awmte pawh an chhang nghal zel a ni.

Public Information Campaign neih lai hian NRHM hnuaiah Champhai District Hospital atanga thawkchhuak Doctor rualte chuan Zaingen Community Hall hnuaiah a thlawna inentirna an buatsaih bawk a, hetah hian natna chi hrang hrang zawnchhuahna khawl changkang phur, Mobile medical unit te pawh tangkai taka hman a ni.

Campaign ah hian Field Publicity leh DAVP ten hmasawnna kalpui dan thlalak hmanga phochhuahna Photo Exibition buatsaihin, Mizoram State Aids Control Society MSACS te pawhin HIV AIDS laka fimkhur a tul zia inzirtirna lam hawi lehkhabu leh thuziak chi hrang hrang an phochhuak bawk.

PIC hi naktuk ah Khawhai ah chhunzawm leh a ni ang a, naktip khian Biate ah zawhfel a ni ang