Vawiin chawhma dar 11:00 hian DC Conference Hall ah Bharat Scouts & Guides Serchhip District ten Kum 5 chhung (2016 - 2021) atana an President leh Commissioners te lakluhna (Investiture) hun an hmanga, Bharat Scouts & Guides Serchhip President thar atana District Bawrhsap Dr. Lalrozama, IAS lakluh a ni.

President thar lakluhna hi Pu Lalngilneia, Joint Secretary, State Headquarters; Aizawl in a nei a, Serchhip District Bawrhsap Dr. Lalrozama, IAS chu Bharat Scout & Guide puanzar hmaah intiamna thu sawi tirin, Serchhip District Bharat Scouts & Guide President atan a lalut a ni. District Bawrhsap President atana an lakluh rual hian, Vice President paruk, Commissioners hrang hrang sawm hnih leh pahnih (22), District Joint Secretary pakhat leh nihna chelhtu dang engemaw zat an lalut nghal bawk.

Inkhawm hi Pu Lawmawma, District Education Officer leh District Chief Commissioner, Bharat Scouts & Guides Serchhip District in a kaihhruai a. Pi Vanlalnghaki, Joint Secretary, Serchhip District Bharat Scouts & Guides chuan inhmel hriattirna hun a hmang. Bharat Scouts & Guides Serchhip District dinhmunte, hmalakna leh hmachhawp kal mek te Pu Lalthianghlima , Secretary District BS&G in report pe in, Serchhip District ah hian Ni 5 September, 2001 khan Bahrat Scouts & Guides hi din tan ani a, Deputy Commissioner apiang te hi President atan hman nghal thin an ni. Serchhipa DC lo awm tawh zawng zawngte pawh Bharat Scouts & Guides ah hian President lo ni vek tawhin, District Education Officer apiangte hi District Chief Commissioner an ni nghal zel a ni.

Bharat Scouts & Guides hi khawvel huapa tlawmngai pawl lian ber niin, midang te tana malsawmna ni tur leh khua leh tui tha ni tura mite ziritrtu leh mi puitlinga chherchhuaktu an ni a. Thalaite leh zirlaiten kawng engkima hmasawnna an neih theihna tura kawhhmuhtu leh kaihhruaitu anni. Bharat Scout & Guides State Hqrs Aizawl te buatsaihin kum kumtawp lam hian Mysore ah zirlai naupang 76 te zinpui tum an ni bawk a ni.

Vawiina Bharat Scouts & Guides Serchhip District ten President leh Commissioners te lakluhna (Investiture) inkhawm hman zawh hian President thar hovin Meeting hmasaber an nei nghal a, Pawl sum tuak dan turte, kumin kum tawpa District huap Bharat Scouts & Guides ten ‘Campfire’ an neih dan turte leh Bharat Scouts & Guides Serchhip District hmalakna kal zel dan tur te an rel nghal bawk a ni.