3652/2022-2023
Dated Serchhip, the 22nd February, 2023: Vawiin khan Serchhip district Bharat Scouts & Guides te chuan World Thinking Day, 2023 lawmna hun Chawngbuangi Memorial School, Dinthar vengah an hmang a, Pi Nazuk Kumar, IAS, Bawrhsap leh District President, Bharat Scouts & Guides chuan khuallian niin a hmanpui.

He hun hi Pi J. Lalbiakmawii, Guide Captain kaihhruaiin Girls Scouts ten Scout & Guides Flag pawt pharhin hun bul a hawng a, Pi R. Lalneihthangi leh Mary Zothanpuii, Guide Captain ve ve ten inkhawm hi an kaihruai a ni.

Khuallian Pi Nazuk Kumar chuan, Scouts & Guides hmalakna hian India chauh nilovin khawvel huapin min thlung khawm a, hnam tinte inzahtawnna te, inhriatthiam tawnna leh thil tha ngaihhlut tur dik chawisang tura thawh hona te min pe a. Tunlai khawvelah pawh khawvel pum huapa harsatna, mitinten rilru hmunkhat pua kan hmachhawn tur tam tak a awm zel a, khawvel muanawm zawk leh nuam zawk din turin Scout & Guides te hian nasa takin hma a la reng a ni. Unau vek kan nih anga a tul ang zela intanpui tawnna, keini pawhin tunhnaia Myanmar raltlan kan phak tawka kan lo tanpuina te, Europe khawmual lama indona avanga unau an intanpuina ang chi te leh kan chenna khawvel thianghlim taka vawng tura hmalakna te, hriatna leh thiamna lama hmasawn zel tura beihna te leh hmalakna duhawm tak tak kan neih mekte hi chhawm nung zel ila. Khawvel ram tina kan unau kan hmalak ang bawka hma la mek te leh; kan hmalak hona hlawkzia leh tangkaiziate hrereng chungin he Thinking Day hi i hmang ang u, tiin a sawm a ni.

He hunah hian Little Flower Convent School, Chawngbuangi Memorial School leh Millenium High School, Chhiahtlang a Scouts & Guides ten item hmuhnawm tak tak an entir a, Pi Vanlalnunziri, Dist. Assistant Commissioner chuan Scouts & Guides dintute nupa chanchin tlangpui sawina a hmang bawk a ni.

World Thinking Day hi 1926 atanga neih tan niin Scout & Guides din chhuaktu Lord Robert Biden Powell leh a nupui Lady Baden Powell te piancham February ni 22 ah amahni chawimawi nana neih thin a ni. An nupa hi an piancham a inang a ni. He ni hi Scouts & Guides ten khawvel hmun tina an unaute an rilrua an hriatchhuahna ni, an hmalaknaten khawvel pumah hna a thawk zel a ni tih hriat tharna ni leh Scouts & Guides hmalakna chunga lawmthu sawina ni atan an hmang thin a. Tun hnaiah Girls Scout leh Girls Guide ten ram dang leh hmun danga chengte nunphung, zia leh nunhlui chanchin inhriatpawhna atan leh inngaihhlut sak tawn nan an hmang uar zual ta a ni.

Inkhawm hi Pu CVL Hruaia, District Secretary in lawmthu sawiin hun a khar a ni.