Government Mizo High School chuan an school zirlai Matric pass thar te lawmsakna hun vawiin khan an school kawtah an hmang a, bialtu MLA I&PR Minister Pu Lal Thanzara’n a hmanpui.

Lawmpuina thu sawiin Minister chuan Sap Missionary ten Mizoram tana rohlu min hnutchhiah pawimawh tak pakhat chu zirna in min siamsak hi a ni, a ti a. Vawiin thlenga Mizorama High School hmasa ber Government Mizo High School tluang taka a la kal zel thei chu lawmawm tiin school chu Sawrkar school tihmingthatu a nih avangin Headmaster, Staff leh thawktu zawng zawng te chungah lawmthu a hrilh bawk.

Matric pass thar te hnenah Pu Vanneihtluanga chuan lawmpuina leh fuihna thuchah a sawi bawk a, Headmaster Pu Lalrammawia chuan an school chuan zirna mai bakah naupangte puitlinna kawnga zirtirna tha pek leh mahni ke-a dingchhuak thei tura chher hriam chu an tum ber a nih thu sawiin chumi tihlawhtling tura theihtawp an chhuah thin thu te a tarlang bawk.

Government Mizo High School atang hian 2016 HSLC Exam beitu 239 an awm a, 197 passed neiin Distinction 20, First Division 46, Second Division 74, Third Division 57 an awm a, Pass Percentage hi 82.5 % a ni.