Vawiin ah khan Mizoram State Bharat Scouts & Guides chuan Mizoram hmun hrang hrang ah lawmman semna hun an hmanga. He ni puala programme lianber chu Vanpa Hall ah Mizoram Governor Lt Gen Nirbhay Sharma (Retd) hovin hman a ni.

Lawmman dawngtute lawmpuina leh zirlai te te fuihna thu sawiin Scouts & Guides tel te chuan puitlinna kawnga training pawimawh tak ah zirlai an nih chhungin hun an hmang mek a ni a ti a. Mizoram Bharat Scouts & Guides in Sawrkar laipui Flagship programme te a ngaipawimawh chu lawmawm a tih thu sawiin Mizoram hmun hrang hranga an hmalakna ah te zirlai tam zawk an tel a ngai a ti. Scouts & Guides leh zirlai zawng zawng te tan, hrilselna dah pawimawh ber in, English leh Hindi tawng thiam chu chona a ni a ti a. “Ziak leh chhiar thiam ah Mizoram hi kan sang viau a kan in hriat lain Saptawng leh Hindi tawng te duh tawka hmang thiam kan tlem deuh in a lang a. Tawng a kan harsatna te hi min ti zakzum tu leh tuna kan harsatna sut kian hmasak ber tur a ni. State pawnlam mi nasa zawka dawr thei tur chuan heng tawng te hi huphurh miah lova kan zir a ngai “ ti in Governor chuan Scouts & Guides te chu tawng dang thiam kawngah an zirlaipui te entawn ni turin a fuih a ni.

Mizoram State Bharat Scouts & Guides lawmman semna ah hian National Awards hnuaiah Prime Minister Shield Competition leh Rastrapati Scouts/Guides Awards sem a ni a. State Awards hnuaiah Rajiya Puraskar Scouts/Guides Awards, Long Service decoration, Special service Star, Medal of Merit leh Bar to Medal of Merit lawmman sem a ni a Heng te hi Governor Lt Gen Nirbhay Sharma (Retd), Patron, Mizoram State Bharat Scouts & Guides ni bawk leh State Bharat Scouts & Guides ten an sem a ni.

Prime Minister Shield Competition hi India ram pumpui huapa inelna ni in Unit zawng zawng zinga sawrkar hmalakna thlawp tha, vantlang tana fehchhuah tam fal leh ramngaw humhalhna kawng titha zual tehna Mark, 70% aia sang hmu te hnenah hlan niin Govt. Mamawii High School in he lawmman hi an dawng a. Scouts & Guides lawmman sangber, Rastrapati Scouts/Guides Awards chu zirlai 39 in an dawng a. Scouts & Guides tana State Award sang ber, Rajiya Puraskar Scouts/Guides Awards , Governor’s Scouts/Guides Awards an tih bawk chu kumin ah zirlai 117 in an dawng a. Heng bakah hian Lawmman dang dawngtu - Long Service decoration ah 20, Special service Star ah 10, Medal of Merit ah 19 leh Bar to Medal of Merit ah 13 an awm bawk a ni.

Mizoram State Bharat Scouts & Guides lawmman semna hun ah hian Pu Zothanmawia, State Chief Commissioner, Mizoram State Bharat Scouts & Guides chu Chairman niin Miss Lalbiakliani, Guide Captain chuan programme a kaihruai a. Pu Thankhuma, State Secretary, Mizoram State Bharat Scouts & Guides chuan Nikum August leh tun inkar a, Mizoram State Bharat Scouts & Guides hmalakna leh fehchhuahna chungchang a tarlang a ni.