Vawiin khan Agriculture Minister Pu R.Lalzirliana'n Agriculture Department hnuaia Officer leh Staff meeting Lal Thanhawla Auditorium ah a hmanpui.

Pu R.Lalzirliana chuan fuihna thu sawiin Agriculture Department a thawktute chu eng dinhmunah pawh ding se, hna thiam, thahnemngai, office kutke leh innghahna tlak nih tum theuh tur te, mahni hna chanpualah mite awh khawpa thawk tha leh entawntlak nih tum turin a chah a. Agriculture Department-in scheme pawimawh tak tak a kalpui mekte chu bel taka thiam tum turte, mi thiam leh fel nih piahlamah thil hrezau nih a tul tih hriaa an thil zirhote ngun taka ngaithla tur leh an rawngbawlsak mipuite tana chhawrnahawm an nih theih nan tan la turin a sawm a ni.

Agriculture Minister chuan officer leh staff-te chu dik lo taka pawisa lalut lo turin a chah a, mualpho an awm chuan chhan an ni dawn lova, an chungah hremna lekkawh a ni ngei ang, a ti a. Scheme hrang hrang an enkawlnaa sum an hmante dik tak leh thiam taka hmang tur leh kuttlinglova sum laluta reilote a hausak ai chuan hmingthatna a tlo zawk tih hrereng turin a chah a ni.

Agriculture Minister hian District pariatte hman tur kuta ken mai theih chi Pico Projectors a sem a. Parliamentary Secretary Lt.Col.ZS Zuala leh Agriculture Director Dr.C.Lalzarliana ten Block 20 hnenah handheld device GPS an sem bawk.

Agriculture Director Dr.C.Lalzarliana pawhin thu sawiin loneitute hamthatna tura sawrkar hmalakna lawmawm a tih thu leh NLUP avanga central scheme tun hmaa Mizoramin a hman ve theih ngailoh RKVY hman theih a lo nih tak dan a sawi a. Department chuan NLUP leh RKVY sum hmangin loneitute tih mai theiloh hna pawimawh tam tak a thawk a, sawrkarin kut hnathawktute enkawltu Department pawh nasa takin a tuam hlawm a ni, a ti.

Agriculture Officer leh Staff meeting hi Agiculture Addl. Secretary Pu Lalrammawian a kaihruai a. District leh block hrang hranga thawktute an tel kim hle.