Vawiin khan PHED Minister Pu Zodintluanga chuan Kelkang khaw chawm tur tui lakna Champhai PHED Division thawhlai mek chu a hmunah a tlawh. NABARD hnuaia nuai 631 senga hmalakna hi kumin January atang khan thawh tan niin, December, 2017-a thawh zawh tura ruahman a ni chungin tunah hian 60% aia tam chu thawh zawh tawh a ni.

Minister Pu Zodintluanga chuan Mizoramah project delay vanga hmasawnna khawtlai phah sawi tur a tam laia kum hnih chhunga thawh tur kum chanve chhunga zawh ani thei mai tur chu lawmawm a tih thu sawiin, midang tan a entawntlak hle a ni a ti a. A panna tur kawng laih hna departmental-a thawh pawh tha a tih thu sawiin, officer-te chu an hnaah thahnem an ngaih zia a lang a ni, a ti.

Kelkang tui lakna hi solar power hmanga Thikulmual mawng lui (Bangla Lui) atangin 470 metre a sangah stage / tum li (4) hmanga vawrh chhoh tur a ni a. Solar plate 197 hman tur pawh a lo thleng kim tawh a. Solar plate hi phah fel a ni hunah electrified fence a hung tur a ni. Tui hi ni khatah darkar 7 chhung pump a, 40 lpcd tui supply thei tur a duan a ni a. Engineer-te hian kumin July thla hian tui hi pump tan theih an beisei thu an sawi a ni. Approach road laih hi  6.5 km vela thui a ni bawk.

Minister hian Zotlanga UD&PA hnuaia Sports Stadium sak mek chu a tlawh bawk a. Hnathawktute nen inkawmin an thawh dan leh hmasawnna te a ngaihthlak sak a ni.

Minister hi PHED SE Er. Lalrammawia, EE Er. Zohmingliana, Project Director DRDA Pu CC Lalchhuangkima leh PHED SDO leh thawktu dang bakah DIPRO ten an tawiawm a ni.