Zan hnih riaka Champhai tlawh mek, Chief Minister Pu Lal Thanhawla chuan tukin khan Zotlanga Stadium sak mek a tlawh.

Chief Minister hi Stadium sak hna enkawltu NBCC hotuten lo dawngsawngin an hnathawh kalphung leh an thawh chinte an lo hrilhfiah a. Chief Minister-in hriatchian duh a neihte leh harsatna an neihte a sawipui bawk a ni.

Zotlang Sports Stadium sakna tur hi Central Sorkar hnuaia UD&PA Ministry in Rs. 22.3 crore a rawn tum a. Kum 2014 June thla khan sak hna bul tan a ni a, sum sanction a khaihlak avangin sak zawh hun tur hi a khawtlai phah a ni.

Tunah hian hnathawh tur hmabak lian tham la awm chu ground leh running track-a astro turf phah a ni a, astro turf hi a hmun a thleng tawh nghe nghe a ni. Stadium sak hna thawktu hi Balaji Developers, New Delhi niin, anni hian Kolasib-a Stadium sak mek pawh an thawk bawk a. Stadium hi sak zawh a nih hunah mi 3,500 chuang leng thei tura ruahman a ni.

Chief Minister hi bialtu MLA & Parliamentary Secretary Pu T.T. Zothansanga, Champhai DC Pu Vanlalngaihsaka, Champhai DUDO Pi V. Lalmuanpuii leh officer dang ten an tawiawm a ni.