Er H. Lalzirliana, Mamit Bialtu MLA/ Vice Chairman, Road & Infrashtructure Development Board chuan a bialchhung khua Rawpuichhip a tlawh.

Pu Zira chuan Mizoram Sawrkar Flagship Programme SEDP chu mitin huap hmalakna tur niin, tunah hian peihfel tep ni tawh a ni a ti. Mizoram-in hma a sawnna turin kan  Chief Minister zahawm tak leh MLA rual te’n an ngaihtuahna zawng zawng sengin hma an lak mek thu a sawi bawk.

Bialtu MLA chuan Mizote chu hnam thangduang leh kan rilru pawh changkang tak kan ni a, kan chhehvel a hnamdangte hian eng angin nge min hmuh ang tih hi kan in tehna ni se, hnam tlawmngai, huaisen, taima leh Kristianna ngaisang hnam kan ni tih chu kan nunah an hmu tur a ni tiin kan hmalakna reng rengah tum mumal bulfuk tak kan nei tur a ni a ti. Rawpuichhip khua zirlaite chu kan hma-a mi hlawhtling tak takte hlawhtlinna ber chu tum mumal nei, mi taima leh tumruhte an ni tih hria a, thahnem ngai tak leh taima taka an zirlaite zir sauh sauh turin a fuih a ni.

Bialtu MLA hian a bialchhung Airport Group YMA huam chhunga damlote hman tan Oxygen bur a pe a, School Computer neilo te tan Computer pe-in Middle School leh High School te tan Football leh Volleybal net a pe bawk a. Rawpuichhip GSA te tan Football a pe bawk a ni.

Er H. Lalzirliana, Bialtu MLA hi a nupui Pi Lalfamkimi bakah khawtlang hruaitute’n an tawiawm a ni