Vawiin chawhma khan Cultural Hall, State Guest House, Chaltlang ah National Generic Document Registration System tlangzarhna hun hman a ni a, Pu Tawnluia, Dy. Chief Minister chu khuallian a ni a, Pu Lalruatkima, Land Revenue & Settlement Minister leh Pu Ruolkhumlien Buhril, IAS, Secretary, Govt. of India te chu khual zahawm niin he hun hi an hmanpui a ni.

Khuallian Pu Tawnluia, Deputy Chief Minister chuan,’ Sawrkar dawrna kawnga harsatna hrang hrang awm thei, inkalpawhna avang te, inbiakpawhna lam avang tein mipui ten buaina kan  tawk fo thin a, National Generic Document Registration System hmanga mahni inlum atanga kan document mamawh tihfel zung zung a theih dawn ta hi a lawmawm hle a ni,’ a ti a,’ Hei hian sawrkar langtlang leh tha siam kawngah nasa takin a puih ngei ka beisei a, NGDRS hman theih a buatsaihtute chungah lawm thu ka sawi a ni,’ a ti bawk.

Pu Lalruatkima, Minister, Land Revenue & Settlement department chuan,’ Inhmun leh ramri chungchang buaina hrang hrang kan tawh thin te hi NGDRS hian a chinfel phah ngei ka ring a, document registration mai bakah Land record felfai tak kan neih theih phah ngei ka beisei bawk a ni,’ a ti a,’ Socio Economic Development Policy sawrkar flagship programme a kan hmalakna tur hrang hrangah pawh NGDRS hi hmanraw tangkai tak tur a ni bawk dawn a ni,’ a ti.

Pu Ruolkhumlien Buhril, IAS, Secretary, Govt. of India chuan, Mizoram chu NGDRS hmang hmasate zingah an tel thu a sawi a, India ram pum ah Mizoram chu hmang hmasa 6 na niin India hmarchhak state ah 2 na  anih thu a tar langa bawk. Pu Roulkhumlien Buhril chuan,’ India ram puma registration software pakhat hman anih chuan sawrkar tan ruahmanna leh hmalakna hrang hrangah a pui hle dawn a ni,’ a ti a,’ India a state 23 te chuan za zela sawmkua land record an computerised tawh a, state 22 te chuan za zela sawmkua computerised registration an ti tawh bawk a ni,’ a ti a, Mizoram ah pawh computerised registration chu uar zawka kalpui turin leh sawrkar hnathawhna kawng hrang hrangah a felfai in a awlsam phah dawn thu a sawi bawk.

Vawiin NGDRS tlangzarhnaah hian Pu R Lalramnghaka, Special Secretary, Land Revenue & settlement department in kal khawmte lawmna thu a sawi a, Pu Lalmuanpuia, Deputy Director leh Dr RK Das, State Informatics Officer ten NGDRS hman dan tlangpui an sawi a, Pu Hukum Singh Meena, IAS, Joint Secretary, Department of Land Resources, Pi Neeta Verma, Director General, NIC, Delhi te pawh in thu sawina hun an hmang bawk a ni. Pu Tawnluia, Dy CM chuan NGDRS hman anih theih nana hmalatu NIC Pune leh NIC Mizoram te hnenah lawmthu sawina lehkha ziak a hlan a, Mizorama NGDRS hmang hmasa ber hnenah document hlanna hun a hmang nghal bawk a ni.

NGDRS hi Aizawl District-ah kalpui tan a ni dawn ta a, Ram inlei, inpek, Bank-a dahkham, document registration. Etc., tur ten Settlement Officer/Asst.Settlement Officer ( Sub-District Registrar) hnenah kal hmasa lovin, mahni in atangin online-in kan document-te submit tawh tur a ni a, http://igrmizoram.nic.in ah lut in, citizen login ah lut leh in document registration tur te hi upload mai tur a ni. Upload hunah hian Settlement Officer/Sub-District Registrat hnena inlan hun tur Ni leh darker zat te mipuiin duhthlangin, duhthlan fel hnuah SMS in settlement officer hnena inlan hunah hian ram neitu thar leh hralhtute, LSC mortgage tute, Document dang registration titute etc. an in lan ngei a ngai a, fingerprint leh thla lak vek tur a ni tawh ang.

LSC NEITU NIHNA INTHLAK DAWN A HRIATTURTE:

Revenue department a hming thlak tur reng reng chu Sale Deed, Gift Deed Registration tih hmasak tur a ni a, Deed Registration ti lo chuan hming thlak theih a ni lo.

LSC hi in pek a nih chuan Gift Deed siam tur a ni a, in lei/hralh a nih chuan Sale Deed siam tur a ni. Deed Sample hi

 https://landrevenue.mizoram.gov.in/post/deed-sample ah en theih a ni e.

Deed Registration hi online a tihtur a nih avangin a hnuai a mi te hi neih vek tur a ni.

LSC Original leh Duplicate(Issue tel anih chuan)

Certificate of Land Valuation: (Issue atanga Kum thum valid a ni a, a thih tawh chuan LSC Section ah update tir phawt tur a ni.)

LSC Clearance Certificate: (LSC Section ah laktur a ni.)

EPIC Card(Ram neitu leh a nei chhawngtu tur.)

Sale Deed/Gift Deed:Sale Deed/Gift Deed ah hian LSC nei chhawngtu leh a hlan chhawngtute Passport size thlalak bel tur a ni a, an hming chungah an sign vek bawk tur a ni a, hriatpuitute pawh in an sign vek bawk tur a ni.

Heng a chunga mi te neih vek tawh hnu ah https://igrmizoram.nic.in ah in register in ,document te hi submit tur a ni a, appointment a chunga sawi ang khian book nghal tur a ni.

Appointment hmuh niah Document zawng zawng leh a Party pahnih te Settlement Officer Cum sub-District Registrar Office ah kal in, a party-te SO/ASO hmaah interview tur a ni. Interview zawh hnu hian, Property Registration Room ah registration ti tur a kal tur a ni a, hetah hian computer ah thlalak leh fingerprint te lak tur a ni.

LSC MORTGAGE DAWN A HRIATTURTE:

Revenue department a LSC Mortgage tur reng reng chuan Mortgage Deed Registration tih hmasak tur a ni a. Mortgage Deed Registration ti lo in LSC a mortgage theih loh. Mortgage Deed Sample hi landrevenue.mizoram.gov.in/post/deed-sample ah en theih a ni.

 LSC Original leh Duplicate (Issue tel a nih chuan)

LSC Clearance Certificate: (LSC Section ah lak tur a ni. LSC no. 1-700 of 1988 hma lam leh Cadsatral LSC te chu Directorate of Land Revenue, Khatla atanga lak tur a ni a, LSC No. 701, 1988 hnu lam zawng chu Settlement Officer’s Office, Mizoram new Capital Complex, MPSC building thlangah lak tur ani)

EPIC Card (LSC Holder)

Mortage Deed ah hian dahkhamtu leh Bank Manager in an sign vek tur a ni a, hriatpuitute pawh in an sign vek bawk tur a ni.

Heng a chunga mite neih vek tawh hnu ah https://igmizoram.nic.in ah in register in, document te hi submit tur a ni a, appointment book nghal tur a ni. Bank-a thawkte pawn online hian an submit sak thei vek a ni.

Appointment hmuh ni ah Doucmenet zawng zawng leh a dahkham tu tur (LSC Holder ngei) Settlement Officer/Assistant Settlement Officer Cum Sub-District Registrar Office ah kal in, interview tur a ni. Interview zawh hnu hian, Property Registration Room ah registration ti tura kal tur a ni a, he tah hian computer ah thlalak leh fingerprint lak tur ani.

https:/igrmizoram.nic.in/

Online-a document submit chungchangah harsatna neite tan a hnuai Common Service Centre te hi pan theih an ni..