Vawiin khan Sports & Youth Services Minister Pu Robert Romawia Royte Pisa ah  World Police & Fire Games, Chengdu China a neih a India aiawh a tel Mizo hmeichhe boxer 3 - Vanlalduati (BSF), Lalbuatsaihi (SSB) leh Lalfakmawii Ralte (SSB), medal la te chawimawina hun buatsaih a ni a, Mizoram Sawrkar aiawhin Sports Minister in lawmpuina thilpek a hlan a ni.

Sports & Youth Services Minister Pu Robert Romawia Royte chuan medal la hmeichhe boxer pathum – Vanlalduati (BSF), Lalbuatsaihi (SSB) leh Lalfakmawii Ralte (SSB) ten khawvel huapa hlawhtlinna neiin, medal an la chu a lawmpui tih sawiin India flag hnuaia International level ah medal la tlemte zinga in tel thei hi thil ropui leh chhinchhiahtlak tak a ni, a ti. Minister chuan sports hi fitness leh nun tihhlim nan mai bakah medal lak nan leh eizawn nana kan hman thiam a pawimawh a, engtin nge  hemi lamah hian nasa zawka kan kal ang tih chu Sawrkar thar chuan a dah pawimawh hle thu a sawi. Sports hmasawn zelna tur leh infiammite hmakhua ngaiin sports chu industry ah sengluh tum anih thu a tarlang a, hemi atan Sawrkarin ngaihtuahna a sen mek thu a sawi.

Sawrkar chuan sports tih hmasawn chhoh nan leh infiammite hlawhtlinna an neih theih nan theihtawp a chhuah zel tur thu Sports Minister chuan sawiin Mizoram State Sports Games kumina kan neih tur te pawh hi nakum a National Games atana inpuahchahna a ni a, sports discipline kan bawh loh leh hriat lar lohte chawinun kan tum dawn a ni, a ti a. Sports association ten sawrkar an tawiawm that avangin he hunah sports association hruaitu kalte chu lawmthu a hrilh a ni.

Boxer te chawimawina programme hi Pu V. Lalzawmliana, Vice President, Mizoram State Sports Council in kaihruaiin Vanlalduati leh Lalbuatsaihi te hnen atangin report ngaihthlak a ni.

World Police Games & Fire Games hi Chengdu China ah August ni 9 leh ni 18 inkara neih a ni a, khawvel ram hrang hrang 79 atangin police leh dan kenkawhtu lamah thawk infiammi 8000 an fuankhawm a. Vanlalduati hi Border Security Force (BSF) ah thawk mekin Hmeichhe Boxing 51 kgs category a Gold Medal a la a. Lalbuatsaihi in Hmeichhe Boxing 64 kgs category a Gold Medal la in Lalfakmawii Ralte in Hmeichhe Boxing 81 kgs category a Gold Medal la ve thungin, anni pahnih hi Sashatra Seema Bal (SSB) ah thawk mek a ni a. India police leh paramiltary team aiawhin an zuk tel a ni.

World Police Games & Fire Games hi kum 1985 atanga neih tan niin kum hnih danah zel neih thin a ni a, khawvel ram hrang hranga police, dan leh thu pek kengkawhtute an tel thin a. He Games hi a mihring tel zat ngaihtuahin Commonwealth Games ai pawhin infiammi tel an tam thin a ni. Kumin Games ah hian India in medal 286 an la a, chungte Gold 139, Silver 81 leh Bronze 66 te an ni.