Vawiin hian Pi Sangchhin Chinzah, Serchhip Bawrhsap leh Serchhip District Sanitation Task Force Chairman ni bawk chuan, Serchhip khawpui chu Open defecation Free Plus khua (ODF Plus) khua a nih thu (preliminary) a puang.

District Sanitation Task Force in uluk taka inendikna (structural audit) a neih hnuah, khawpui chhunga local authority ten ODF Plus an nih thu an inpuan vek hnuin ODF Plus an nihna Preliminary Resolution vawiin hian an siam a. Chu Preliminary Resolution ang chuan Pi Sangchhin Chinzah hian Serchhip chu Open Defecation Free Plus a nih thu a puang ta a. Ti hian Serchhip hi Mizorama ODF Plus khua nia Preliminary Resolution siam hmasa ber an ni.

ODF Plus a inpuang tur hian ODF khua nih tawh hnuah thil dang tlin belh ngai a awm nual a; khawpui vawnfaina kawngah Bye Law mumal tak neih te, chu Bye Law chu mipuite hnena tha taka puanzar te, khawpuiin vantlang inthiarna mumal, felfai leh tunlai tak a neih te a tul a, tin tuallaia inthiar leh bawlhhlawh paih mai mai te hremna dan mumal tak neih te leh thil pawimawh dang engemawzat tlin ngai a awm a. Heng tlin ngai hrang hrangte hi Serchhip khawpui hian tlin vekin, Solid Waste Management Rules, 2018 behchhanin Bye Law te pawh 2.8.2019 khan District Sanitation Task Force leh Village Council hrang hrang leh tlawmngaipawl aiawhte nen an lo duangin an lo pawm fel tawh a. Mipuite hnena hrilhhriatna pawh nasa takin an kalpui nghal a ni.

Vawiina ODF Plus puanna leh District Sanitation Task Force meeting ah hian Chairman Pi Sangchhin Chinzah chuan, khawpui fai inelna kal meka Village Council hmalakna hrang hrangte, tlawmngaipawl leh kohhran, mimal leh chhungkaw hrang hrang inpekna ah lawmthu a sawi a. Lawmman pakhatna dawn tum kan nih kha kan hriatreng a ngai a, fai hi kan nunphunga behngheh tir tlat kan tum tur a ni, a ti.

Khawpui fai inelna kal mekah Serchhip District Sanitation Task Force hian hma a la nasa hle a, he inelna neih zawh hnu lawka Swachh Survekshan, 2019 lo awm lehnghal tur thlir telin ruahmanna tam tak a siam a ni.

ODF Plus Declaration dan in a phut ang chuan Preliminary Resolution hi chanchinbuah tihchhuah a ni anga, ni 15 chhungin mipui atangin sawhkhawk emaw sawiselna a nei a nih loh chuan Final Resolution neih zui tur a ni ang. Final Resolution chu State thuneitute hnenah hrilhhriat a ni anga, endikna an rawn kalpui zui dawn a ni.