Vawiin chawhma khan DC Conference Hall, Kolasib District ah Kolasib District PMAY Screening Committee te an thukhawm a, Pi Sangchhin Chinzah, Deputy Commissioner chuan he hun hi kaihruaiin Pu K Lalrinliana, Food, Civil Supplies & Consumer Affairs department Minister, Pu Lalrinsanga Ralte, MLA, Serlui AC leh Pu Andrew H Thangliana, MLA, Tuirial AC ten an telpui a, Kolasib district a Prandhan Mantri Awas Yojana- Housing for All kalpui chhunzawmna tur atana inbuatsaihna te enhoin hmalak dan tur te sawi ho a ni.

Beneficiary led Construction scheme hnuai a PMAY-HFA kaltlanga Kolasib, Kawnpui, Vairengte leh Bairabi huam chhung a insak tanpuina hmu thei hming 1791 chhawpchhuah a zirchian niin dilna lut zing a 137 hnawl an nih chhan te endik a ni bawk. Kolasib district chhung a PMAY kalpui mekah anih dan tur anga hma la lote bawhzui dan te sawi a ni a, District Urban Development Office-a thawktute chuan hma la tur a hriattirna an pek thin thu an sawi a, tanpuina an hmuh tur tih tawp sak leh an hmuh tawh laklet sak thleng a bawhzui ngai a awm thin thu an sawi bawk a ni. Kolasib district huam chhungah heng hamthatna hmu awm ngawih ngawih, lehkha pawimawh a tul ang neih loh avang a tanpuina hmu ve thei lo an awm thu tarlan niin heng te hi a bik takin Aadhar card siam tir duh lo an nih thu tarlan a ni bawk. Vawiin thutkhawmah hian PMAY hnuaia hmalakna chak zawk a kalpui a nih theih nan District Urban Development Office (DUDO) a thawktute leh Bank hrang hranga hotute awlsam zawk a an indawr tawn dan tur te rel a ni bawk.

DUDO, Kolasib district in a tarlan danin December 2019 thleng khan Kolasib khaw chhung ah PMAY hnuaia insak kalpui mi 311 an awm a, heng zing ah hian mi 135 te chuan 3rd Installment thleng an hmu kim tawh a, Kawnpuiah mi 147 zing ah 43 ten an hmu tawh bawk a ni.

Pradhan Mantri Awas Yojana Housing for All (Urban) Mission hi 2015 atanga 2022 chhunga kalpui tur a ruahman a ni a. He Mission hnuaiah hian Mizoramah vertical pahnih - Beneficiary-led Construction Scheme (BLC) leh Credit Linked Subsidy Scheme (CLSS) te kalpui mek a ni. Mission guideline in a sawi ang in, Beneficiary-led Construction Scheme (BLC) hnuaiah hian insak tanpuina Rs. 1,50,000/- ruahman a ni a, dilna lo lut te hi Department thawktute leh LC/VC leh NGO’s ten en tangkawpin Door-to-door Verification neih leh vek a ni a. Door-to-door verification report hi District Screening Committee (DSC)-ah pharhin DSC-in BLC Scheme hnuai atan a tanpuina hmu thei awm a a pawm zat beneficiaries hmangin BLC Detailed Project Report (DPR) a buatsaih leh dawn a ni.