Vawiina Directorate of Sports & Youth Services Building thar hawnna a Khuallian Pu Robert Romawia Royte chuan kum 33 chhung zet mahni puala building nei lova mi in luahlawra lo awm thinin Building thar tha tak an nei ta chu lawmawm a tih thusawiin a thawktu zawng zawngte bakah infiammite leh Sports Associations te tan pawh lawmna tur a ni a ti a,Office staff ten hun vawng dika phur tharnan leh tanlak lehzualnan hmang se a duh thu a sawi.

Minister chuan “Department pathum ka enkawl ve a,ka sawi tawh thin angin ka Department pathumte hi Allocation of Business Rules dinglaiin a tarlan kan subject items te hrechiang tur leh Department dang subject an remtihna lova khawihsak lo turin ka chah nawn leh duh a,Central Ministry hrang hrang leh funding agency dangahte kan subject atana hmasawnna tur project kan siam zung zung a pawimawha,kan project siamte engemaw zat sanction a nih avangin a thawkhahte ka chawimawia ka lawmpui a ni” a ti.

SEDP Sorkar Flagship Programme a nih avangin Official ten zirchiangin a hlawhtlinna atana theihtawp chhuah tlan vek chu Sorkar hnathawkte mawhphurhna a ni a ti.

Minister Pu Roberta chuan Chief Minister zahawm tak Pu Zoramthanga kaihhruai Sorkar hi Manifesto a ding tlat;a hmatiam tihlawhtling zar zartu a ni a ti a.Minister chuan kan intiam angin Mizoram Sports Policy kum khat chhungin kan peihfel,Zu zawrh kan titawpa,Sikul kai hun kan hnam milin kan thlaklet a,District thar pathum a takin a function mup mup tawh a,Vehicle Tax kan siam thaa,Khawvel Zofate insuihkhawm nan hma kan la a,leilung piantirh ata a vawikhatnan budget-ah sum pawh MNF sorkarin kan dah,Corruption dotu- Lok Ayukta atakin kan dinfela;a tul chuan Chrief Ministe,Minister te leh Chief Secretary te pawh ama thuin a chhuiin a hrem thei a ni.Reilote chhungin motor kawngpui hrang hrang te siamthat mek a ni a,Central Schemes lian leh Foreign Funding a takin Mizoramin a chhawr tan mek ta e a ti.

Minister chuan Mizoram Sports Policy thar hlawhtlinna a lan tan mek thusawiin Mizoram Sports in hma asawn theih nan Policy tharin a sawi angin Foreign Funding lian tham hmuh a beiseiawm tan thute,Private Company lian tepawh an lo lang tan mek a,Tata Company nen Agreement Thar an sign thuai dawn thu a sawi bawk.Sports Minister chuan Mizoram State Games neih zawh tak chu infiammite tan kawng hrang hrang in a hlawk hle thu a sawi a,Ram Roreltuten sports atana ngaihtuahna an hman thar dante sawiin a that em avangin neih chhunzawm zel tum anih thu a sawi.

Minister chuan “CM Pu Zoramthanga leh Deputy CM Pu Tawnluia te nen theihtawp kan chhuah hova,an kaihhruaina zarah kumkhat chauh kan sorkar chhungin Football Fields 13 a phullem phahna tur sanction tihfel a ni tawh a,Badminton Court 6 zet lenna Standard Hall lian 1 leh Hockey Astro Turf Ground 1 siamna tur pawh sanction tihfel a ni tawh a ti.Khawthlang lama Hall lian ala awm veloh avangin Mamit-ah Multi Purpose Indoor Hall lian tham tak sak tan mek anih thu a sawi bawk.Dawrpui Indoor Basketball Court cum Music Centre sak tan mek pawh “Thalaite mamawh chhanna dik tak” ni tura a ngaih thu a sawi bawk.

ICT Minister ni bawk Pu Robert Romawia Royte chuan ICT Deptt chu Deptt tereuhte mahnise a pawimawh em em a,Mobile phone tihthat nan Tower phunbelh teuh a ngaia,hemi a hlawhtlinnan AMC Building Regulation pawh Cabinet in a siamtha tawh a,mobile connectivity in hma a sawn nasa hle,thingtlang lamah pawh mobile leh internet connection tam tak pekbelh a ni a,Zoram cover chhuah thuai tum a ni a ti.Aizawl Smart City project leh scheme dangte hmangin ICT lamah a thazawngin Revolution (hmasawnna pui) a thleng dawn a ti.

Tourism Minister ni bawk chuan Sorkarin Allocation of business Rules te siamthain Hotel leh Restaurant,thingpui dawr etc te Tourism Deptt mawhphurhnaah a awm thar ta a,kawngdung hotela ei in buatsaih dan leh chhawp dan phungte tihchangtlun tum a ni a ti.Chaltlang Tourist Lodge pawh changkang taka sakthat tura tihfel tawh anih thusawiin Reiek leh hmun dangte pawh Tourist Destination pawimawh tlinga siam turin hnathawh tan thuai tum a ni a ti.Cultural Heritage Tourism lam hi ngaihthah a ni reng thin a,Pu Zoramthanga kaihhruai Sorkar chuan Hnam tana a pawimawhna hriain Foreign ram pathumah leh Mizoram pawn India ram hmun sarih a Zofate insuihkhawmna atan Zo Kutpui a buatsaih tur zingah Zampui Tlangah hlawhtling taka neih tawh a ni a,a dang hmun 6 ah neih leh tum a ni a ti.

Building hawn tak sakna sum cheng nuai 1040.42 hi North East Council atangin hmuh a ni a. He hna thawk tura thlan Lushai Engineers te chuan December, 2016 khan an thawk tan a ni. Building hi chhawng riata sak niin recreation hall, museum, gym, motor parking zau tawk tak leh conference hall mi 150 thut theihna dah a ni a. Scouts and Guides, NCC leh NSS te tan room dah a ni bawk.

Hawnna programme hi Sports Director Pu Zothanmawia’n a kaihruai a, Mizoram State Sports Council Secretary Pu C.Laltlanthanga’n technical report pein Sports Deputy Director Pu Vanlalrova’n lawmthu sawiin hun hnung a khar a ni.

Attachment

  • Loading attachment...