Biate Water Supply Scheme (Pumping) project Rs.1364.67 lakhs man chu Ministry of Urban Development, Govt of India chuan ni 27th April, 2015 hian sanction order a tichhuak.
Biate khaw tui lakna tur project hi sorkar-in a buaipuina a rei tawh hle mai a. PHE department chuan DPR siamin Ministry of DoNER-in kum 2007-2008-ah khan a retain a. He retention bawhzui hian khaw 11 (3 towns and 8 villages) chawm turin Rs.34.18 crore project siam a ni a. Mahse NLCPR guideline-in census town leh census town lo te chu project pakhata khung a remtih loh avangin census town pathum tuam turin Rs.28.76 crore project siam a ni leh a. He project hi DONER Ministry a thehluh a nih hnuin DONER chuan Rs.15 crore-ah a lo tihniam leh a. Ministry lamin project cost a lo tihhniam tak avang hian kum 2009-2010 khan Biate leh Khawhai tuam turin project hi re-cast leh a ni ta a ni. Hetih lai mek hian North Vanlaiphai khua hian tui lakna tur lui hnar a neih that loh avangin project-ah hian telh ve leh niin Rs.28.11 crore man siam lehin kum 2013 khan DoNER-ah a submit leh ta a ni.
Project hi sanction loa a inchiah tak reng avang leh mipuiin harsatna an tawh reng bawk si avangi hian Biate khua, census town ni bawk, talin tui an neih thuai theih nan tiin UD&PA leh PHE Minister ni kawp Pu Zodintluanga kaihhruainain PHE leh UD&PA officer ten DPR an buapui nghal char char a, chu chu Ministry of Urban Development hnuaia 10% Lumpsum Grant Scheme atanga funding hmuh turin thehluh a ni ta a, chu chu MoUD, GoI hian a lo sanction ta a ni.
Biate Water Supply Scheme chungchangah hian Pu Zodintluanga, UD&PA leh PHE Minister chuan tihian a sawi a, “Biate khaw mipuiten nghakhlel taka an lo thlir mek laiin Ministry of DONER hian min sanction mai si lo a, Biate khaw mipuite pawh an beidawn phah ve hle a ni,” a ti. A sawi zelnaah Minister chuan Biate Water Supply Scheme project sanction a nih theih nan hian PHE Department leh UD&PA Department officer-te chu an thawk ho tha hle mai a, kawikawm thin ang thapin kawng engkimah an inpuitawn a, detailed project report siam peih a nih hnuah pawh inrawn tlangin State Planning Department-in Govt of India-a a thawn thlakna hnuah pawh department officer pahnihte hian an bawhzui dun char char a, vawiin hi kan thleng ta a ni. Hetiang reng renga Department pahnih thawh dumna tha hi Minister ka nih ve chhungin ka la tawng ngai lo a, UD&PA leh PHE department-te chungah pawh lawmthu ka sawi a ni, a ti.
Biate khuw chawmtu tur tui hi Tuipui atanga pump chhuah tur a ni a, tui pump chhuah tur zat hi 135 LPCD a ni a, tam tawk tura ngaih a ni a. Tun dinhmunah Aizawl khawpuiah tui pump chhuah zat hi 70 LPCD vel a ni.
