Kar hmasa Zirtawpni leh Inrinni (April 24-25) khan ‘Regional Consultative Conference on Swine Flu and Other Emerging Infectious Diseases’ tih thupuia hmangin North Eastern Council hmunpui Shillong-ah IDSP leh Medical College hrang hranga mithiamte an in hmu khawm a. He Conference –ah hian India hmar chhak state ho danglam bikna hre chunga khawvel a hripui leng thin laka hmalak dan tur sawiho a niin Ministry of Health & Family Welfare a mi pawimawh leh medical scientist ten an rawn hmanpui. He Conference-ah hian Swine Flu test tura hmun dang a thawn tawh lova mahni state theuhah RT – PCR hmang a NEC hma lak dan turte sawiho a ni.

Mizoram IDSP State Nodal Officer Dr Pachuau Lalmalsawma leh Aizawl Civil Hospital a Microbiologist Yogesh Malvi te chu he Regional Conference -ah hian state aiawhin an zuk tel a. Kal kalkhawmte chuan tun hnaia India ram chhunga AH1N1 Flu leng chung chang thlir hovin hmar chhak state hrang hrang ten mahni hmalakna leh hmachhawpte kal khawm hmaah an tarlang hlawm.

NEC-GoI Secretary Ameising Luikham chuan kalkhawmte hmaah Mizoram IDSP hmalakna chu fakin hmar chhak state dangte tan entawn tlak a nih thu a sawi chhuak. Hemi chung changah hian IDSP Nodal Officer Dr Pachuau Lalmalsawma chuan harsatna tam tak pal tlanga in lungrualna nen Department chhung leh pawn lama tanrualna leh media lam a thawkte tawiawmnaah lawmthu a sawi.