Vawiin khan Health Directorate Conference Hall, Dinthar ah Annual Review Meeting On Blindness neih a ni a, District Programme Manager (Blindness), Chief Medical Officer leh Eye Surgeon te an kal tha hle. He hun hi Dr. C. Lalthanmawia, Joint Director of Health Services, i/c Director of Health Services chuan hmanpuiin Isua hnathawh chhunzawm thei a kan awm avanga lawmthu sawina chang kan hriat a pawimawh thu sawiin kan nitin hnathawhna ah thahnem ngaihna rilru kan put a pawimawh tak zet zet ani a ti. Lal Isua ngei pawh khan Mitdelte mit a tih var sak thu sawiin, khawvel mawin hmu ve lo te leh hmuhfiah lo te’na damna an lo chan theihna tura hnathawh nawmzia te sawiin phur taka hna kan thawh a ngai tak zet a ni a ti a, a venna lamah pawh tan kan lak a tul a ni a ti, hlawh hmuh nan mai thawk lova rawngbawltu kan ni tih hrereng chunga rinawmna nen a thawk thin turin kalkhawmte a chah a ni.

District hrang hranga Programme Manager (Blindness) ten an performance report te an pek zawh hnu in Dr. F. Lalhmingthanga, State Programme Officer (National Programme for Control of Blindness) chuan Kum 2008 – 2009 chhunga State hmalakna hrang hrang report pe in India ramah hnathawk tha ber te zing ami kan nih thu a sawiin Mizoram in a hma kan lak tawhna leh kan hlawhtlinna neih tlangpui te tarlangin Mitnaute paw (Cataract) thalo mi 2383 zai that sak an niin, mi 2153 zet te hnenah IOL (Intra Ocular Lens) an mitah dah sak an ni bawk a, a chhawrtu tam zawk te hi mirethei zawk a ngaih te an ni. School naupang mi 47452 te an mit endik sak anni a, heng zinga mi 5328 te chuan mit thatlohna an nei a ni tih hmuhchhuah a ni a, naupang rethei zual mi 3245 te hnen ah a thlawn a Tarmit pek a ni bawk. Zirtirtu mi 920 zet te hnenah Eye Checkup neihdan zirtirna pek an ni tih a tarlang bawk a ni. Central in Eye Bank te kan lo neih takah chuan Eye Donation ah target mi 10 min rawn bituk ah tun thleng hian mi 79 zet ten a mamawh apiangte hnena hman turin an mit an donate avanga lawmthu a sawi tel bawk a, hei hi kan Kristianna nen pawh inmil thlap anih thu a sawi tel bawk a ni. District hrang hrangte hnathawhdan khaikhawmin Civil Hospital, Aizawl & Lunglei, Aizawl West District ten State in target a bituk zat an khum vek a, Kolasib District, Champhai District leh Mamit District ten Target an phalo tih a tarlang bawk. Heng report hrang hrang te pek zawh anih hnu hian kan hnathawhna zawn theuh a tan mar pat a tul tak zet thu leh nasa leh zual a thawh a ngaih thu rel aniin rawtna tha tak tak te sawiho a niin a theih ang chin chin ah hman nghal tum a ni bawk.