Vawiin hian Lawngtlai DC Conference Hall ah Lawngtlai District Level Monitoring Committee for BPL Baseline Survey chu an Chairman Pi A. Muthamma, IAS, Lawngtlai Bawrhsap ni bawk hovin an thukhawm a, Below Poverty Line dik tak dapchhuah hna (Baseline Survey) neih dan tur an rel.

State Level Monitoring Committee in ruahmanna a siam bawhzuia he meeting hi buatsaih a nih thu sawiin A. Muthamma chuan, District chhunga chhungkaw tinte chu tlawhchhuaka Below Poverty Line chhungkua an nih leh nih loh enfiah vek tur a nih thu leh chung report te chuan May ni 31 hmaa DC Office-a thehluh hman vek tur a nih thu a sawi.

Meeting hian mipuite tan ni 10 tal Complain na hun hawn a ngaih avangin Block Level atangin May ni 20 ah District Level hi thleng vek hman se tiin a rel a, Block Level ten khawtina thawktu tur training hi tun thla ni 15 hmain nei vek hman se, tiin a rel bawk.

BPL Survey 2016 atan hian Economics and Statistics Department chuan a tehfung siamsa, thawktute hman tur a buin a buatsaih a. Chutah chuan BPL chhungkuaa tel theilo tur chiang sa hriat theihnate, BPL chhungkaw ni chiang sa hriat theihna te leh chhungkaw dangte BPL chhungkua an nih leh nih loh chhutchhuah dan mumal takte a awm sa a. A pawisa zawnga chhut chuan khawpuia chhungkua, chawhruala member pakhat zelin thlakhata Rs 2100 chin lalut tlinglo leh thingtlang lama Rs 1800 lalut tling lote chu BPL an ni dawn a ni.

BPL Baseline Survey hi kum hnih danah neih zel tura ruahmanna siam a ni bawk. He meeting ah hian tlawmngaipawl aiawhte, District chhunga BDO zawng zawngte, Lawngtlai DCSO leh District Researh Officer leh mi pawimawh dangte an tel a ni.