Vawiin khan Mizoram University Auditorium-ah National Commission for Human Rights (NHRC) member Pu Cyriac Joseph chuan Human Rights Seminar a hawng. Pu Cyriac Joseph hi Supreme Court of India Judge lo ni tawh thin a ni a, Karnataka leh Uttarakhand High Court-ah te Chief Justice a lo ni tawh bawk. Tunah hian NHRC-ah acting Chairman nihna a chelh mek a ni.

National Seminar hawn tak thupui hi Protection of Human Rights and Assuring the Unity and Integrity of the Nation tih a ni a. Mihring dikna chanvo humhim chunga ram leh hnam inpumkhatna vawnhim dan chungchang zirho niin MZU Vice Chancellor Prof.R.Lalthantluanga, Delhi a Superintendent of Police Sanjay Kumar Jain IPS, IIT Hyderabad atangin Prof. Nand Kishore Acharya leh National Human Rights Commission Asistant Director hna chelh lai Dr. S.K. Shukla te pawh hawnna inkhawmah hian telin thu an sawi a ni.

Khuallian Pu Cyriac Joseph chuan India ram chu hnam leh tawng hrang, sakhua leh culture hrang tam tak inzawm khawmin a siam a, inpumkhatna leh inunauna vawng nung chunga mimal dikna chanvo hum him hi ram leh hnam suihkhawmna pawimawh a ni, a ti. Khawvel hmun hrang hranga University-te chu zalen taka suangtuahna thar puak chhuahna leh ngaihdan sawichhuahna hmun a ni a, chutiang a nih chhunzawm zel theih nan MZU zirlaite a fuih rualin he zalenna an neih hi ram leh hnam inpumkhatna tichhe zawnga hmang lo turin a chah a ni.

Seminar hi NHRC leh Mizoram University tangkawp buatsaih niin Dr SK Shukla leh Dr H. Elizabeth te chu Coordinator an ni a. Ni hnih awh tur niin thupui thlan bik hmangin mithiam ten thu an sawi a ni. Vawiin chawhnu khan session hnih neiin Prof. Margaret Ch.Zama, MZU; Ms.Yeshasvini Ramaswamy, Bengaluru; Prof.Kanagaraj Easwaran, MZU ten thu an sawi a. Chawhnu lamah Mizoram DGP Pu Thianghlima Pachuau; Dr.Capt G.Dhanan Jaya Rao, Military and Paramilitary Forces for United and Peaceful India; Pu Lallianchhunga, MZU leh Prof.C.Devendiran, MZU ten thu an sawi bawk.