Pu Zodintluanga, UD&PA leh PHE changtu Minister hovin tukin khan PWD, P&E, PHE, UD&PA leh Aizawl Municipal Corporation hotuten Aizawl khawpui chhunga veng 3-a motor intawhkhawmna thler hrang hrang te chu siamthat theih a nih leh nih loh an en ho.
Minister hova sorkar offfical thawk chhuak te hian Chanmari West leh Vaivakawn inrina Hunthar peng lai tak mai chu rawt hniam a, motor kawina lai tur hi tihzauh theih a ni dawn em tih an en a. Hunthar Veng an en zawhah hian Bawngkawnah kal lehin Ramhlun, Chaltlang, Eden Thar te atanga motor lo tlan intawhkhawmna Bawngkawn traffic point bul zingzum chu an en bawk a, a chhehvela ram te chu a neitute biaka sorkara an hlan theih leh theih loh emaw sorkar-in a tul chuan dan hmangin acquire theih dan remchang emaw te zawn theih a nih chuan Bawngkawn motor intawhlhawmna chu a zau hawk thei dawn a ni. Helai hi tihzauh a nih theih chuan motor pawh innghah khawm vak ngai lovin a kal theih dawn a ni. Bawngkawn junction en zawh a nih hnu hian Ramhlun North Industry peng chu en leh a ni a. Helaia motor chhuk leh chhova intawk te chu inkal chhawk ngai titiha a awm avangin motor veivah nuam zawka siam dante a awm em tiin an thlir ho leh a ni.
Minister chuan, Aizawl khawpuiah hian mipui kum tinin kan pemin kan pung chho zel a, India ramah pawh thingtlang aia khawpuia mipui chen tamna state kan ni a, chuvangin kan khawpuite hi mumal zawka enkawl chhoha veivahna nuam tak kan siam hi a ngai a. Chumi thlentir thei tur chuan sorkar department hrang hrangten mahni department bil ngaihtuah lova mipui tana thawk kan nih hriain theihtawp kan chhuah tlan a ngai a ni, a ti.
Dr. C. Vanlalramsanga, UD&PA leh Planning Secretary chuan heng junction siamthatna tur hi mumal taka plan siam a nih hunah a siamna tur sum chu sorkarin a ngaihtuah mai tur thu leh, mipuite awlsamna leh khawsak nawmna tur zawk a nih dawn avangin sorkar tan pawh sum ngaihtuah harsa lo tur zinga mi a nih thu a sawi a ni. Pu Lalringliana, Deputy Mayor, Aizawl Municpal Corporation pawhin thu sawiin inspection neihnaa sorkar department hrang hrangte nena hma an la ho chu lawmawm a tih thu a sawi a. Aizawl khawpui tawt zelah leh motor lo pung chho zelah Bawngkawn zingzum lai chu motor inkalpawh leh intawh harsa tak a nih avangin siam zau theih a nih chuan AMC lam atang pawhin theihtawp an lo chhuah tur thu a sawi a ni. He inspection-a tel ve Pu Vanlaltluanga, Engineer-in-Chief pawhin heng thler hrang hrang an enho te hi uluk takin PWD chuan survey neiin plan leh drawing mumal tak a lo siam dawn tih a sawi.
Pu Zodintluanga, Minister chuan PWD-in plan mumal tak an siam hnuah chuan kopang leh kawng laih chhiat ngai lai emaw laih hniam emaw kawng chhun san ngai emaw a awm a nih chuan chumi tihna lai tura department hrang hrangte hnathawhna tui pipe, electric ban, telephone ban leh hrui leh thil dangte te pawh sawn a ngai ang a, chutah chuan department te chu kawikawm thin ang thapa pheikhai rual taka thawh a ngai dawn a ni, a ti. Junction hrang hrang siam thatna tur plan te hi PWD hovin an peihfel hunah enho-a sawiho leh a ni ang a, tihlawhtling turin hmalak chhunzawm a ni ang.
Vawiina thler zingzum (junction) hrang hrang inspection neihah hian Secretary, UD&PA leh Dy Mayor, AMC, Engineer-in-Chief, PWD bakah Director, UD&PA; Chief Engineer, PHE leh P&E; Municipal Commissioner, AMC; UD&PA officer te leh AMC lama engineer te an tel a ni. Junction inspection thawh hnihna hi naktuk 8th April 2016, zing dar 7-ah Dawrpui Jail Veng leh Republic Veng – College veng pan thlaknaah te neih leh a ni ang.
