Champhai Bawrhsap Pu Vanlalngaihsaka, IAS chuan vawiin khan District Sports & Youth Services Office buatsaiha Non-Residential Football Coaching zirchhuak te leh 2014-2015 chhunga State Level leh District Level inelnaa tithate hnena lawmman semna hun chu a hmanpui. He hun, I&PR Auditorium-a neih hi Pu Lalngilneia Colney, DSYO chuan kaihruaiin, Sorkar office hotute leh sports association hruaitu thenkhat ten an telpui a ni.

Khuallian Bawrhsap chuan kalkhawmte chu naupang tak tak infiamna khawvela hmabak eng tha nei nia a hriat thu sawiin, tuna an lawmman dawn te hi bultanna ni tura a duh thu leh, taimakna leh nun uluk tak chunga kal zel turin a chah a ni.

DSYO Pu Lalngilneia Colney chuan Ministry of Youth Affairs, New Delhi-ah District leh State Level Women Competition 2014-2015-a Prize money (medal winner) pe chhuak tura hun eng emawchen Sorkar hotuten an nawr hnuah kumin March thla khan lak chhuah theihin chin fel a nih chauh thu leh, chu chu vawiina sem hi a nih thu a sawi a.

District Level Women Sports Competition-ah hian infiamna category hrang hrang pariatah Champhai District atangin lawmman dawng thei 126 an awm a. State Level Sports-ah hian category hrang pangaah lawmman dawng thei mi 24 an awm a ni.

Vawiin hunah hian Pu Lalbulliana, Football Coach, SYS Department chuan Champhai-a Non-Residential Football Coaching kalpui a nih dan tlangpui report a pe a. He coaching programme hi Champhaiah chuan September 2015 atang khan naupang kum 14-17 inkar tan kalpui tan a niin, a thlawn vekin zirtirna hi pek an ni a. Heta tanga zirchhuak, vawiina certificate hlan te hi mi 40 an ni.