Khawpui chhunga faina lama mawhphurtu department UD&PA chuan Housing & Urban Development Corporation (HUDCO)-in HUDCO Award for Best Practices to Improve the Living Environment 2015-2016 a buatsaih Sanitation category hnuaia UD&PA Department-in Mizorama Sorkar leh Young Mizo Association (YMA) te nena tangkawpa bawlhhlawh a lakkhawm dan ziahna chanchin ‘Low Cost Sanitation Solutions’ tia a vuah a thehluh chu Committee for HUDCO Award chuan lo zir chiangin UD&PA Department leh YMA chu lawmman la turin a lo thlang ta a ni.

HUDCO Award for Best Practices Mizoramin a lak chungchangah hian UD&PA Minister Pu Zodintluanga chuan, Mizoram chu mipui mimirin faina ngai pawimawh a Sorkar hmalakna a thlawp tlat avangin ram danga an tih theih loh in tina bawlhhlawh khawn hi Aizawlah chuan kan ti thei tlat a. Veng tinah YMA member kan awm a, chu chuan inrelbawlna fel tak a keng tel nghal a, sorkarin amah maia mipui sawm chhuak tur ni se harsa leh hah taka a tih a ngai a. Veng chhung vawnfai leh tihthianghlimna kawngah YMA chu a hnarkaituah a tang fo a, chu chuan faina lama hmasawnna kawngah thui tak min pui reng a ni.

Minister chuan a sawi zelnaah, HUDCO hian India ram State Sorkar hrang hrang hnenah HUDCO Award for Best Practices an buatsaih tur thu hi a hriattir a. Chu chu Mizoram pawhin lo dawng vein remchangah kan la a, faina chungchanga kan hmalakna te kan thawn thla ve ta a ni, a ti. He award kan lak theihna chhan hi officer te inpekna leh thawhrimna nasa tak vang a ni a, an chungah pawh lawmthu ka sawi a. Nikum pawh khan faina lama kan hmalakna avangin UD&PA Department chuan Skoch Award a lo dawng tawh bawk a ni, Minister chuan a ti.

HUDCO hi Ministry of Housing & Urban Poverty Alleviation, Govt. of India hnuaia corporation pawimawh tak, New Delhi-a Headquters nei a ni. HUDCO Award hi Habitat Centre, Lodhi Road, New Delhi-ah 25th April, 2016-ah sem a ni ang.