33/2022-2023
Kolasib dated 2nd May 2022: Vawiin chawhnu khan Kolasib DC pisaah Brig. C.Vankunga Shopping Centre, Kolasib thawmthat dan tur relin Management Committee-te chuan thutkhawmna an nei a, hmalakna tur hrang hrang sawi ho niin May ni 20, 2022 aia tlai lo ah Management Committee member-ten a hmun ah Shopping Centre endik nise tiin an rel.

Brig. C.Vankunga Shopping Centre Management Committee Chairman Pu John LT Sanga, Deputy Commissioner, Kolasib district chuan mipui vantlang tan a hmun laili leh tangkai tak a hman mek Shopping Centre chu Kolasib hmel lanna a nih angin mipui hip leh zual thei tur a thawmthat a tul thu a sawi a. Indawr tawn nana hmun thianghlim, him leh tlawh chakawm a nih theihna turin Management Committee member-te chuan uluk tak a ngaihtuahna seng chunga hma lak ho a tul thu a sawi.

Vawiin thutkhawmnaah hian Pu Timothy R.Lalhmangaiha, DUDO, Member Secretary ni bawk chuan report a pe a, tukverh, Electric wiring, inthiarna siam that ngai te sawi ho a niin lawn liam theih loh tura a hungna siam that leh rawng hnawih that dan tur te sawi a ni bawk. Siamthat ngai zawng zawngte chu mithiante nen endik a, senso ngai zat chhut chhuah a Management Committee hnenah May ni 20, 2022 aia tlai lo ah thehluh tur a rel a ni.

Brig. C.Vankunga Shopping Centre kawng an hnuai (Basement) hi Motor hun nana hman a ni aKawng an (Ground Floor) ah hian dawr 16 leh chhawng khatna ah dawr 17-a awm a, luah khah vek a ni. Mizoram Rural Bank-in chhawng hnihna hi luah mekin chhawng thumna hi District Urban Development Office-in an luah bawk a ni.