Vawiin khan Parliamentary Secretary to Chief Minister Pu Lal Thanzara'n Govt. Mizo High School-ah RMSA sum hmanga sak Building thar a hawng.

Pu Lal Thanzara chuan intodelhna chu thiamna tel lova neih theih a ni lova, mi thiam ngah tur chuan zirna in leh hmanraw tha neih a ngai, tiin Govt. Mizo High School-in RMSA sum hmanga building thar tha tak an nei chu lawmawm a tih thu a sawi. Parliamentary Secretary chuan Mizoram hmung hrang hrangah School building za tel sak belh a nih piahlamah sorkarin hma thar chak taka lain thingtlang High School zirtirtute luah tur quarters unit 145 zet sak zawh a nih tawh thu a sawi bawk. Education Reforms Commission rawtna tipuitling turin sorkarin hma a la mek zel tih pawh sawiin nakin lawkah chuan Education Service siam tum a ni, a ti a. Mimal leh kohhran school tam takin kum tin result tha tak tak an nei thin tih sorkarin a hria a, chuvangin hma an sawn zel theih nana thawm that leh zirtirtute hamthatna ngaihtuah chu sorkarin a duh a ni, Pu Lal Thanzara chuan a ti bawk.

Govt. Mizo High School Building thar hi February 2011-ah sak tan niin a sak nan RMSA atangin sum cheng nuai sawmthum singriat leh sangkhat hmuh a ni a. Chhawng hnih a sak niin room paruk - Classroom pahnih, Science Laboratory pakhat, Computer Room pakhat, Art & Craft room pakhat leh Library pakhat a nei a ni.

Govt. Mizo High School Principal leh an School Management&Development Committee (SMDC) Chairman ni bawk Pu Lalrammawia'n hawnna inkhawm hi a kaihruai a, SMDC Secretary Pu C Lalhuliana'n building sak dan a report a, Pi VL Lilychamdeli'n lawmthu a sawi a ni.