Vawiin khan hian Pachhunga University College-ah thisen petute kutpui 'Blood Donors Festival' chu ropui taka hman a ni.

Mizoram State AIDS Control Society (MSACS), Association for Voluntary Blood Donation (AVBD), Health Department, Pachhunga University College NSS leh Red Ribbon Club te tangkawp chuan October ni 1 'National Voluntary Blood Donation Day' denchhenin vawiin khan Pachhunga University College Campus-ah 'Blood Donors Festival' hi an hmang a ni.

He Festival MSACS Project Director, Dr. Lalmalsawmi kaihruai-ah hian Khuallian Heath Secretary, Esther Lalruatkimi chuan, damlai huna midang te tana thil tha tih a pawimawh thu leh thih hnu-ah pawh midang te tana mi inpe tia hriat reng hlawh chu thil pawimawh tak a nih thu sawiin, 'Midangte tana thil tha tihna kawng awlsam tak chu thisen pek hi a ni,' a ti a. Pachhunga University College zirlaite chu thisen pek uar lehzual turin a fuih bawk.

He inkhawmah hian Dr. Eric Zomawia, Director, Hospital and Medical Education leh Dr. K.Ropari, Director, Health Services ten thu an sawi a. AVBD General Secretary, Lalnunnema chuan thisen pek kawnga AVBD hmalakna sawiin, thisen pek uar lehzual turin zirlaite a fuih a. Mizorama mimal-a thisen pe tam mi pali te chu chawimawi an ni bawk. Civil Hospital leh Synod Hospital, Durtlang Blood Bank-a hnathawktuten fuihna thu an sawi bawk a ni.

Festival-ah hian Pachhunga University College Vice Principal, Dr. C.Lalrawna chuan thu sawiin, kum 1994 atang khan Pachhunga University College chuan bahlah awm miah lovin kumtin thisen pek runpui (blood donation camp) an buatsaih thin thu a sawi a. Kum 1998 khan nikhatah thisen unit 333 pein Mizoram record an siam a, he an record hi kum 2011 khan khumin, nikhatah thisen unit 425 an pe leh bawk tih a sawi a. Pachhunga University College hian a vaiin thisen unit 2500 chuan an lo pe tawh niin a sawi bawk a ni.