Mission Veng Bazar atanga Mission Veng Thlanmual panna Bulldozer step tih hming chawi tir chu tukin zing khan Social Welfare Minister Pu P.C. Lalthanlianan a hawng.  Social Welfare Department bultuma Rs. 4,12,000.00 senga Mission Veng YMA South Branch ten an rem he step hi kum 1959-a Mission Veng Field lai tura Bulldozer kal kawng anih avangin he hming hi chawi tir a ni.

 

 

Step hawn puala thutkhawm tawite DYO Hall-a neihah chuan Minister chuan thil tenau leh langsar tham lo tak tak Minister ten an hawng thin ti a sawiselna tam tak karah hetiang step tha leh rinawm Minister hawn tlak Branch YMA pakhatin a puitlin thei chu a lawm thu a sawi a, veng dang tan pawh entawn tlak niin a ngai. Pu P.C. Lalthanliana chuan LAD emaw department engpawhin vengchhung inkalpawhna step a siam thin ah hian standard pakhat neih nise a that tur thu leh chu chu ke a kal thinte tan zan thim tham karah pawh a him zawk a rin thu te sawiin hmun hrang hranga step te hi inang khat vek a siam a tul a ni a ti.

He step hawn tak hi Ft 173 a sei Ft. 8 leh a chanve a zau rahbi 140 leh landing 10 niin Mizorama thlanmual hmasa ber 1905 a Kristian Thlanmual tia Zosap Missionary te ruahman panna kawngpui ber a ni.